Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 563 Hüküm no: 711 Orijinal metin no: [108b-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nemçe elçisinin yüklerini taşımak üzere Küçükçekmece nahiyesinden 10 adet öküz arabası tahsis edilmesi hükmü Kıdvetü’n-nüvvâbi’l-müteşerri‘în Küçükçekmece nâhiyesinde nâibü’ş-şer‘ olan mevlânâ ( ) -zîde ilmühû- ve mefâhirü’l-emâsil ve’l-akrân a‘yân-ı vilâyetin iş erleri -zîde kadruhüm-a tevkī‘-i refî‘-i hümâyûn vâsıl olucak ma‘lûm ola ki bundan akdem şikâr-ı hümâyûnum için nâhiye-i mezbûrdan ihrâcı fermânım olan öküz arabaları şikâr-ı hümâyûnuma iktizâ eylemekle imdi ihrâcı fermânım olan öküz arabalarından Edirne’ye varınca Nemçe elçisi ağırlığı için Küçükçekmece nâhiyesinden on aded öküz arabası ihrâc ve Âstâne-i sa‘âdetime acele üzre getirip kabza memûr olana teslîm ettirmekde her biriniz ihtimâm edip ihmâl ve müsâheleden ihtirâz eyleyesiz deyû fermânım olmuşdur buyurdum ki hükm-i şerîfimle vardıkda bu bâbda sâdır olan emrim üzre amel edip dahi kat‘â te’hîr ve tevakkuf eylemeyip Nemçe elçisi ihrâcı acele için Küçükçekmece nâhiyesinden on aded öküz arabasını mu‘accelen ihrâc ve bir gün evvel Âsitâne-i sa‘âdetime getirip kabza memûr olana teslîm ettirmekde her biriniz ihtimâm edip avk ve te’hîrden be gāyet ihtirâz eyleyesiz şöyle bilesiz alâmet-i şerîfe i‘timâd kılasız. Tahrîr fi’l-yevmi’s-sâmin aşer min Şevvâl sene [10]90.