Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 564 Hüküm no: 715 Orijinal metin no: [109a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi’nin Karahalil köyüne ait topraklarda hayvanlarını yaylayıp kışlatmasına müdahale edilmemesiyle ilgili hüküm sureti Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn hüccetü’l-hakkı ale’l-halkı ecma‘în vârisü ulûmi’l-enbiyâ’ ve’l-mürselîn el-muhtassu bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhû-[ya] tevkī‘-i refî‘-i hümâyûn vâsıl olucak ma‘lûm ola ki dârende-i fermân-ı hümâyûn Yorgi nâm zimmî südde-i sa‘âdetime arzuhâl edip bu koyunlarıyla varıp yaylak ve kışlak zamânları varıp kazâ-i mezbûre müzâfâtından Terkos nâhiyesine tâbi‘ Karahalil nâm karye toprağında yaylayıp ve kışlayıp otundan ve suyundan intifâ‘ etmekle Terkos mukāta‘ası zâbiti olanlar resm-i kışlak defter-i hâkānîde vâki‘ hâsıl yazılmışdır bundan yaylak ve resm-i kışlak taleb etmeğin bu dahi tahammülüne göre vermeğe râzı iken mukāta‘a-i mezbûre zâbiti olanlar kanâ‘at etmeyip hilâf-ı kānûn tahammülünden ziyâde taleb edip te‘addî eylediğin bildirip ol bâbda emr-i şerîfim ricâ eylediğin ecilden buyurdum ki hükm-i şerîfimle vardıkda husûs-ı mezbûra tamâm hak ve adl üzre mukayyed ve mukāta‘a-i mezbûre zâbitinden Dergâh-ı mu‘allâmda ihrâc olunmuş mühürlü sahîh sûret-i defter-i cedîd-i hâkānî taleb ve nazar edip göresin, karye-i mezbûre toprağında vâki‘ olan yaylak ve kışlak yerlerinde resm-i otlak ve resm-i kışlak deyû vakfa hâsıl yazılmış ise yaylak ve kışlak zamânında karye-i mezbûre toprağında olan yaylak ve kışlak yerlerine varıp yaylayıp ve kışlayıp otundan ve suyundan intifâ‘ eyledikde yaylak ve kışlak resmini tahammülüne göre verdikden sonra tahammülünden ziyâde resm-i yaylak ve resm-i kışlak talebiyle bunu mukāta‘a-i mezbûre zâbitine rencîde ve remîde ettirmeyip men‘ ve def‘ eyleyesin ve arz eylediğin bu hâric re‘âyâdan olmağla otlak zamânında koyunları ile yine karye-i mezbûre toprağına varıp durup otundan ve suyundan intifâ‘ etmekle karye-i mezbûre zâbiti olanlar resm-i otlak nâmına ziyâde taleb eder imiş ana dahi mukayyed olup göresin, bu hâric re‘âyâdan olmağla otlak zamânında koyunları ile karye-i mezbûre toprağına varıp durup otundan ve suyundan intifâ‘ edip karye-i mezbûre zâbiti olanlara öşr ve resm-i mîrîsin vermez ise üç yüz koyunların bir sürü i‘tibâr edip a‘lâ sürüden bir koyun evsat sürüden bir şişek ednâ sürüden bir toklu otlak hakkını verdikden sonra hilâf-ı kānûn ziyâde nesne taleb ettirmeyesin min ba‘d şer‘-i şerîf ve kānûn ve emr-i hümâyûnuma muhâlif kimesneye iş ettirmeyesin ve kaziyyede medhali olmayanları dahl ettirmeyip eslemeyip inâd ve muhâlefet üzre olanları ism ü resmleriyle vukū‘u üzre yazıp Dergâh-ı mu‘allâma arz edip husûs-ı mezbûr için tekrâr emr-i şerîfim varılmalı eylemeyesin şöyle bilesin alâmet-i şerîfe i‘timâd ve ba‘de’n-nazar bu hükm-i hümâyûnumu bunun elinde ibkā edip alâmet-i şerîfe i‘timâd kılasın. Tahrîren fî evâsıtı şehri Şevvâli’l-mükerrem li sene tis‘în ve elf. Mahrûse-i Kostantıniyye el-mahmiyye Vasale fî 12 Zilka‘deti’ş-şerîfe sene [10]90.