Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 569 Hüküm no: 725 Orijinal metin no: [110a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köstemir’deki şikâr-ı hümâyûn için saman ve odun tedarik olunmasıyla ilgili hüküm sureti Mefâhirü’n-nüvvâb ve’l-müteşerri‘în Çatalca ve Büyükçekmece ve Küçükçekmece ve Terkos nâhiyeleri nâibleri -zîde ilmühüm- ve mefâhirü’l-emâsil ve’l-akrân a‘yân-ı vilâyetin iş erleri -zîde kadruhüm-a tevkī‘-i refî‘-i hümâyûn vâsıl olucak ma‘lûm ola ki bundan akdem şikâr-ı hümâyûnum için zikr olunan nâhiyelerden iştirâsı fermânım olan zehâyirden Çatalca nâhiyesinden bin yetmiş iki kantar saman ve yedi yüz kırk beş araba odun ve Büyükçekmece’den altı yüz doksan altı kantar saman ve otuz dört araba odun ve Terkos nâhiyesinden dört yüz yirmi üç kantar saman ev üç yüz yirmi dört araba odun bâkī kaldığı ilâm olunmağla ale’l-acele tahsîli ve bir gün evvel Çatalca menziline nakli lâzım ve mühim olmağla imdi vech-i meşrûh üzre zikr olunan nâhiyelerden bâkī kalan saman ve odunu bir def‘a edâ eylemeyen karyeler ahâlîsinden bi eyyi vechin-kân tahsîl ve tedârük ve menzil-i mezbûra nakl ve kabza memûr olana teslîm ettirip avk ve te’hîrden be gāyet ihtirâz eyleyesiz deyû fermânım olmuşdur buyurdum ki hükm-i şerîfim vardıkda bu bâbda sâdır olan emrim üzre amel edip dahi kat‘â te’hîr ve tevakkuf eylemeyip zikr olunan nâhiyelerden bâkī kalan saman ile odunu bir def‘a edâ eylemeyen kurâ ahâlîsinden bi eyyi vechin-kân mu‘accelen tahsîl ve tedârük ve bir gün evvel menzil-i mezbûra nakl ve kabza memûr olana teslîm ettirilmekde her biriniz ziyâde ihtimâm edip avk ve te’hîrden be gāyet ihtirâz eyleyesiz şöyle ki fermânım üzre bir gün evvel nakl ve teslîm olunmamağla müzâyakaya bâ‘is olasız cümleniz itâba müstahak olursuz şöyle bilesiz alâmet-i şerîfe i‘timâd kılasız. Fi’l-hâdî ve’l-ışrîn [min] Ramazân sene [10]90. Be makām-ı Kostantıniyye.