Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 571 Hüküm no: 728 Orijinal metin no: [110b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Podime, Karacaköy ve Belgrad köyünden bazı zimmilerin ödediklerinin dışında başka bir teklifle rahatsız edilmemeleriyle ilgili hüküm A‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘ü’l-fazl ve’l-yakīn keşşâfü’l-müşkilâti’d-dîniyye hallâlü’l-mu‘dilâti’l-yakīniyye miftâhu künûzi’l-hakāyık misbâhu rumûzi’d-dekāyık el-mahfûf bi sunûfi avâtıfi’l-meliki’l-a‘lâ sâbıkan Anadolu kazaskerim olup hâlâ ber vech-i arpalık Hâslar kazâsına mutasarrıf olan mevlânâ ( ) -edâmallâhu te‘âlâ fezâ’iluhû- tevkī‘-i refî‘-i hümâyûn vâsıl olucak ma‘lûm ola ki kazâ-i mezbûr müzâfâtından Terkos nâhiyesine tâbi‘ dârendegân-ı fermân-ı hümâyûn Podime ve Karacaköy ve Belgrad nâm karye sâkinlerinden ( ) nâm zimmîler Dergâh-ı mu‘allâma arzuhâl edip bunlar üzerlerine edâsı lâzım gelen a‘şâr-ı şer‘iyyelerin ve sâir hukūk-ı rüsûmların şer‘ ve kānûn ve defter mûcebince hâliyâ subaşıları olan Seyyid Nasuh ve Seyyid ( ) nâm karındaşlara edâ edip bir vechile dahl ve rencîde olunmak îcâb eylemez iken ve bunların dahi san‘atları değil iken mezbûrlar mücerred ta‘cîz ve celb-i mâl için biz sizin subaşınız olduğumuz hasebiyle bizim ( ) yük tütünümüz vardır beher vakıyyesi ( ) akçeye olmak üzre siz beyninizde tevzî‘ ve taksîm edip ba‘de zamânin bize akçesin verin deyû hilâf-ı şer‘-i şerîf te‘addî ve rencîdeden hâli olmadıkların bildirip şer‘le görülüp hilâf-ı şer‘ rencîde olunmayıp men‘ ve def‘ olunmak bâbında emr-i şerîfim ricâ eyledikleri ecilden buyurdum ki hükm-i şerîfimle vardıkda bunlara ol vechile rencîde olundukda husûs-ı mezbûra tamâm hak [ve] adl üzre mukayyed olup göresiz arz olunduğu üzre ise eyyâm-ı sa‘âdetimde fukarâya ol vechile te‘addî ve rencîde olunduğuna kat‘â rızâ-yı şerîfim yokdur imdi subaşıları mezbûrlara muhkem tenbîh ve te’kîd eyleyesin ki bunlar üzerlerine edâsı lâzım gelen a‘şâr-ı şer‘iyyelerini ve sâir hukūk ve rüsûmlarını şer‘ ve kānûn ve defter mûcebince edâ eylediklerinden sonra bunları subaşıları mezbûrlara ol vechile te‘addî ve rencîde ettirmeyip men‘ ve def‘ eyleyesin ba‘de’t-tenbîh eslemeyip yine vech-i meşrûh üzre te‘addî ve tecâvüz ederler ise vukū‘u üzre yazıp bildiresiz min ba‘d şer‘-i şerîf ve emr-i hümâyûnuma muhâlif kimesneye iş ettirmeyesin kaziyyede medhali olmayanı karışdırmayasın eslemeyip inâd üzre olanı vukū‘u üzre yazıp arz eyleyesin, şöyle bilesin alâmet-i şerîfe i‘timâd kılasın. Tahrîren fî evâili şehri Zilhicceti’ş-şerîfe sene tis‘în ve elf. Kostantıniyye el-mahmiyye Vasale fî şehri’l-mezbûr.