Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 573 Hüküm no: 733 Orijinal metin no: [111a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’dan Edirne’ye gidecek olan padişah ve kafilesi için Küçükçekmece nahiyesinden zahire satın alınması için hüküm Kıdvetü’n-nüvvâb ve’l-müteşerri‘în mevlânâ Küçükçekmece nâibi -zîde ilmühû- ve mefâhirü’l-emâsil ve’l-akrân kethüdâ yeri ve yeniçeri serdârı ve a‘yân-ı vilâyetin iş erleri -zîde kadruhüm-a tevkī‘-i refî‘-i hümâyûn vâsıl olucak ma‘lûm ola ki işbu sene-i mübârekde hareket-i hümâyûnum vâki‘ olmağla Âsitâne-i sa‘âdetimden Edirne’ye varınca menâzil zahîresi tedârük ve iştirâsı lâzım ve mühim olmağın imdi Büyükçekmece menziline nakl ile şa‘îrin her İstanbul kilesi otuzar akçeye ve dakīkin her kilesi yüzer akçeye ve samanın kantarı otuzar akçeye ve odunun arabası ikişer çeki gelmek üzre her arabası seksener akçeye ve otluğun arabası ikişer yüz vakıyye gelmek üzre her arabası yüz yirmişer akçeye olmak üzre Küçükçekmece nâhiyesinden bin beş yüz keyl şa‘îr ve üç yüz yirmi keyl dakīk ve bin kantar saman ve iki yüz yirmi beş araba odun ve elli araba otluk mu‘accelen iştirâ ve tedârük ve menzil-i mezbûra nakl ve kabzına memûr olana bir gün evvel teslîm ettirilmek [için] her biriniz ziyâde ihtimâm edip avk ve te’hîrinde bu bâbda ihtirâz eylemeyesiz deyû fermânım olmuşdur buyurdum ki hükm-i şerîfimle vardıkda bu bâbda sâdır olan emrim üzre amel edip dahi kat‘â te’hîr ve tevakkuf eylemeyip nâhiye-i mezbûreden iştirâsı fermânım olan menzil zahîresi mu‘accelen iştirâ ve tedârük ve bir gün evvel menzil-i mezbûrda kabzına memûr olana teslîm edip ve temessük alıp Mevkūfât defterine kayd ettirip itmâm-ı hizmet eylemeğe her birimiz ziyâde ihtimâm edip ve sâir senelere kıyâs eylemeyip avk ve te’hîrinde bunda ihtirâz eyleyesiz ve zikr olan iştirâya mu‘âf ve gayr-ı mu‘âf dâhildir cümleye ale’s-seviyye tahammüllerine göre tevzî‘ ve âmâde ettirdip biz mu‘âfız deyû kimesneye te‘allül ve muhâlefet ettirmeyesiz ve iştirâsı fermânım olan zahîre hîn-i teslîmde hesâb-ı merkūm üzre akçeleri ashâbına bi’t-tamâm edâ olunur bir akçeleri ketm olunmaz bilmiş olalar alâmet-i şerîfime [i‘timâd] kılasız. Li sene ihdâ ve tis‘în ve elf.