Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 46 Hüküm no: 11 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer kızı Emine Hatun’un vârislerine vasi tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Çavuş Kasım mahallesinde sâkine iken bundan akdem vefât eden Emine Hatun bt. Ömer’in sadrî sagīr oğlu Halil ile sadriye sagīre kızları Afife ve Âişe’nin tesviye-i emrlerine kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf her vechle vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan sıgār-ı mezbûrûnun babaları işbu râfi‘u’l-kitâb el-Hâc İsmail b. Muslu nâm kimesneyi hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri [4b] dahi sıgār-ı mezbûrûn Halil ve Afife ve Âişe’nin vakt-i rüşd ü sedâdına değin tesviye-i emrlerine kıbel-i şer‘den vasî nasb ve ta‘yîn buyurduklarında ol dahi vesâyet-i mezbûru kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’t-tâsi‘ ve’l-ışrîn min-Şevvâli’l-mükerrem li-sene 1129 Şuhûdü’l-hâl: Ahmed Efendi imâm-ı mahalle-i mezbûre, Hüsnü Ağa b. Ahmed, Mehmed Ağa b. Ömer, Mehmed Çelebi b. Hızır, Abdullah Çelebi b. Mehmed, Ali Çelebi b. Mehmed, es-Seyyid Mehmed Ağa b. vekilharç, Mahmud Efendi b. Hasan, es-Seyyid Mustafa b. Sefer.