Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 122 Hüküm no: 78 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şatırbaşı Hasan Ağa oğlu Ali Ağa’nın hayatta iken vasisi tarafından tutulan masraf defteri Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Kiremitçibaşı mahallesinde sâkin iken bundan akdem vefât eden Ali Ağa b. el-merhûm Şatırbaşı Hasan Ağa nâm sagīrin verâseti zevce-i menkûha-i metrûkesi Emetullah bt. İbrahim nâm sagīr ile li-eb kız karındaşı Âişe Hatun ve usûbet-i nesebiyye cihetinden medîne-i Bosna’da sâkin gāîb ani’l-meclis Mehmed Ağa b. Ebubekir’e münhasıra oldukdan sonra müteveffâ-yı mezbûr sagīr Ali Ağa’nın bâ-hüccet-i şer‘iyye hayâtında vasiyy-i muhtârı olan kayın atası mezbûr İbrahim Ağa b. Mehmed’in müteveffâ-yı mezbûr Ali Ağa’nın hâl-i hayâtında ve li-eb kız karındaşı mezbûre Âişe Hatun ma‘rifetleriyle sarf olunan akçenin muhâsebesi defteridir ki ber-vech-i âtî zikrolunur. Fi’l-yevmi ( ) min-Şevvâli’l-mükerrem li-sene tis‘a ve ışrîn ve mi’e ve elf. Menzil isbâtı için verilen harc-ı hüccet 1430 akçe Emir Paşa hânesi tebdîli için sarf olunan 420 akçe Def‘a iki kıt‘a hüccet için verilen harc 840 akçe Tebdîl-i hüccet-i Hasköy için 1260 akçe Müteveffâ-yı mezbûr Ali Ağa’nın vâlidesi merhûmenin Hüseyin Ağa’ya olan deyni için verilen 30.000 akçe Def‘a müteveffâ-yı mezbûrun babasından müntakil mâlından ba‘de’t-taksîm Âişe Hatun’a olan deyni için bâ-hüccet-i şer‘iyye verilen 50.000 akçe Müteveffâ-yı mezbûrun nafakası için alınan hüccet harcı verilen 1620 akçe Müteveffâ-yı mezbûr için kutnî anteri alındı 120 akçe Def‘a müteveffâ-yı mezbûrun hayâtında beyaz anteri ve zıbun alındı 180 akçe Müteveffâ-yı mezbûrun hayâtında beyaz kutnî fistan alındı 810 akçe Müteveffâ-yı mezbûr için cedîd destâr alındı 600 akçe Babası müteveffâ-yı mezbûrdan merhûm Ali Ağa için sim kabza kılıç alındı 1200 akçe Babası fevt olduğu zamânda merhûm Ali Ağa için alınan hırdavât-ı menzil 2000 akçe Babası fevt oldukda müteveffâ Ali Ağa için hatab alındı 4000 akçe Saraylıdan alınan kırmızı kapama için verilen 600 akçe Merkūm için alınan mâ’î peşkir yemeni 130 akçe Camlı oda için alınan minder 3 805 akçe Gulâm için gömlek don mest ve babuc alındı 470 akçe Gulâm için destâr alındı 320 akçe Leyle-i berâtda alınan şem‘-i asel bahâsı 360 akçe Müteveffâ-yı mezbûr için alınan câriye bahâsı 32.640 akçe Müteveffâ-yı mezbûr için gulâm bahâsı 12.000 akçe Îyd-i şerîfde alınan astar? Tahâ ve ücret-i hayyât 8470 akçe Gürcü’den alınan beledî yasdık 40 423 akçe Def‘a dört hüccetlere harc ve kâtibiyye ve hüddâmiye ve kaydiyye verilen 2020 akçe Cem‘an yekûn 153.220 akçe Vech-i meşrûh üzere müteveffâ-yı mezbûrun hayâtında vasiyy-i mezbûr İbrahim Ağa ile kız karındaşı mezbûre Âişe Hatun ma‘rifetleriyle sarf olunan yüz elli üç bin sekiz yüz yirmi akçe olduğu bu mahalle şerh verildi.