Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 126 Hüküm no: 81 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahin Odabaşı kızı Ayşe’nin terekesinin taksimi ile babasından kalan menzilin annesine devri Medîne-i hazret-i Ebâ Eyyüb el-Ensârî -radıye anhu Rabbühü’l-Bârî-’de Câmi‘ mahallesinde sâkin iken bundan akdem vefât eden Şahin Odabaşı b. Abdullah b. Abdurrahman’ın verâseti sulbî sagīr oğlu Mustafa ile sulbiye kızları Âişe ve Fâtıma’ya münhasıra ve tashîh-i mes’elesi dört sehimden olup sihâm-ı mezbûrdan iki sehmi sagīr-i mezbûr Mustafa’ya ve birer sehmi mezbûretân Âişe ve Fâtıma’dan her birine isâbeti tahkīkinden sonra mezbûre Âişe dahi vefât edip verâseti zevc-i metrûku Mustafa Bey b. Receb ile vâlidesi Ümmü Gülsüm bt. Abdullah ve li-ebeveyn er karındaşı mezbûr Mustafa’ya ve li-ebeveyn kız karındaşı mezbûre Fâtıma’ya münhasıra ve tashîh-i mes’elesi on sekiz sehimden olup sihâm-ı mezbûreden dokuz sehmi zevc-i mezbûr Mustafa Bey’e ve üç sehmi vâlidesi Ümmü Gülsüm’e ve iki sehmi mezbûre Fâtıma’ya ve dört sehmi mezbûr Mustafa’ya isâbeti tahkīkinden sonra müteveffâ-yı mezbûr Şahin odabaşının terekesinden olup mahalle-i mezbûrede vâki‘ bir tarafdan ba‘zan Şatır Halil Çelebi ve ba‘zan Mehmed Çelebi mülkü ve bir tarafdan Abdi Çavuş bahçesi ve bir tarafdan tarîk-ı hâs ve bir tarafdan tarîk-ı âm ile mahdûd tabaka-i ulyâsında nîm sofalı bir bâb oda ve dehlîz ve tahta-pûş ve bir matbah ve vustâsında bir bâb oda ve dehlîz ve tahtında bir dükkân ve bir kenîf ve bi’r-i mâ ve bahçeyi müştemil mülk menzilden ber-mûceb-i tashîh-i evvel mezbûre Âişe’ye isâbet eden rub‘ hissesinden tashîh-i sânî üzere merkūm Mustafa Bey’e isâbet ve intikāl eden dokuz sehm hissesini bâ-hüccet-i şer‘iyye bundan akdem Mustafa Bey yetmiş guruşa kayın vâlidesi mezbûre Ümmü Gülsüm’e bey‘ ve temlîk ve teslîm ol dahi ber-minvâl-i muharrer iştirâ ve temellük ve tesellüm eyledikden sonra semeni olan mezbûr yetmiş guruşu mezbûre Ümmü Gülsüm yedinden tamâmen ahz u kabz edip mezbûre Ümmü Gülsüm menzil-i mezkûrun üç sehmine irsen ve dokuz sehmine şirâen mâlik oldukdan sonra mezbûre Fâtıma Hatun tarafından dahi husûs-ı âti’z-zikr ve vekîli olduğu zât-ı mezbûru ma‘rifet-i şer‘iyye ile ârifân el-Hâc Ali Efendi b. Receb ve Mehmed Çelebi b. Hüseyin nâm kimesneler şehâdetleriyle sâbit olan Mustafa Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde müvekkilesi mezbûrenin vâlidesi işbu sâhibetü’l-kitâb mezbûre Ümmü Gülsüm Hatun mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma’ya menzil-i mezkûrdan tashîh-i evvel üzere babası müteveffâ-yı [mezbûrdan] isâbet ve intikāl eden rub‘ hissesiyle kız karındaşı müteveffât-ı mezbûre Âişe’nin rub‘ hissesinden tashîh-i sânî üzere isâbet ve intikāl eden on sekiz sehimden iki sehm hisse-i irsiyye-i şer‘iyyesini tarafından îcâb ve kabûl[ü] hâvî ve şurût-ı müfsideden ârî bey‘-i bâtt-ı sahîh-i şer‘î ile vâlidesi mezbûre Ümmü Gülsüm’e safka-i vâhide ile yüz guruşa bey‘ ve temlîk ve teslîm ol dahi ber-vech-i iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz guruşu merkūm Fâtıma Hatun vâlidesi mezbûre Ümmü Gülsüm’den cihâzına sarf için bundan akdem istikrâz ve kabz [30a] edip hâlâ zimmetinde vâcibü’l-edâ yüz guruş deyne takās eylediğinde mezbûre Ümmü Gülsüm dahi mukāsa ve kabûl edip mezbûre Fâtıma menzil-i mezkûr ve semen ve merkūma müte‘allıka âmme-i de‘âvî ve mutâlebât ve eymân ve muhâsamâtdan vâlidesi mezbûre Ümmü Gülsüm’ün zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi ba‘de’l-yevm menzil-i mahdûd-ı mezkûrda müvekkilem mezbûre Fâtıma’nın vechen mine’l-vücûh ve sebeben mine’l-esbâb alâka ve medhali kalmayıp vâlidesi mezbûre Ümmü Gülsüm’ün mülk-i müşterâsı ve hakk-ı sırfı olmuşdur keyfemâ-teşâ ve hasbemâ-tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketbolundu. Fi’l-yevmi’l-hâmis min-Zilhicceti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: Celeb Hasan Çelebi b. Abdülmennan, Molla Mehmed b. Ali Efendi, Hüseyin Çelebi b. Mehmed, es-Seyyid Mustafa b. Sefer Hoca, Mehmed Çelebi b. Hasan Efendi, es-Seyyid Abdurrahman Çelebi b. Receb, Berber Osman Çelebi b. Halil, Ahmed Çelebi b. Abdullah, Hüseyin Çelebi b. Mahmud, Abdurrahman Efendi b. Abdürrezzak ve gayruhüm.