Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 151 Hüküm no: 107 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkerim oğlu es-Seyyid İsmail Efendi’nin kızına nafaka takdiri Medîne-i hazret-i Ebâ Eyyüb el-Ensârî -radıye anhu Rabbühü’l-Bârî-’de Baba Haydar Nakşibendî mahallesinde sâkin iken bundan akdem vefât eden es-Seyyid İsmail Efendi b. Abdülkerim Efendi b. Mehmed’in sulbiye sagīre kızı Fâtıma’nın ceddesi ve tesviye-i umûruna kıbel-i şer‘den mansûbe vasiyyesi işbu râfi‘atü’l-kitâb umdetü’l-muhaddarât Gülizar bt. Abdullah nâm hatun meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip vasiyyesi olduğum sagīre-i mezbûrenin nafaka ve kisve bahâya eşedd-i ihtiyâcı olmağla babası müteveffâ-yı mezbûrdan müntakil mâlından kadr-i ma‘rûf nafaka ve kisve bahâ farz ve takdîr olunmak matlûbumdur dedikde vasiyye-i mezbûrenin kelimât-ı meşrûhası vâkı‘a mutâbıka idiği zeyl-i vesîkada muharrerü’l-esâmî Müslimîn haberleriyle lede’ş-şer‘i’l-enver zâhir ve mütehakkık olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûrenin babası müteveffâ-yı mezbûrdan müntakil mâlından beher yevm kırk akçe nafaka ve kisve bahâ farz ve takdîr buyurup meclis-i meblağ-ı mefrûz-ı mezbûru sagīre-i mezbûrenin nafaka ve kisve bahâsına harc ve sarf ve lede’l-iktizâ istidâne ve inde’z-zafer mâlına rücû‘a vasiyye-i mezbûre Gülizar Hatun’a izin birle mâ-vaka‘a bi’t-taleb ketbolundu. Fi’l-yevmi’l-âşir min-Rebî‘i’l-evvel li-sene selâsîn ve mi’e ve elf. Şuhûdü’l-hâl: Sa‘id Mehmed Efendi b. Mehmed, Ahmed Efendi b. Ali, Ali Bey b. Halil, Mustafa Efendi b. Abdullah, es-Seyyid Mustafa Çelebi b. es-Seyyid Sefer, es-Seyyid Süleyman Çelebi b. es-Seyyid Mehmed ve [gayru]hüm.