Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 165 Hüküm no: 117 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa oğlu Hüseyin Beşe’nin oğluna vasi tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Bıçakçı Ferhad mahallesinde sâkin iken bundan akdem vefât eden Hüseyin Beşe b. Mustafa’nın sulbî sagīr oğlu Mehmed’in tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan işbu râfi‘u’l-kitâb ammisi Mehmed Çelebi b. Mustafa’yı hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun vakt-i rüşd-i sedâdına değin vasî nasb ve ta‘yîn buyurduklarında ol dahi vesâyet-i mezbûru kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’s-sânî min-Rebî‘i’l-evvel li-sene selâsîn ve mi’e ve elf. Şuhûdü’l-hâl: Mustafa Efendi b. Hüseyin, es-Seyyid Mustafa b. Sefer, es-Seyyid Süleyman b. Seyyid Mehmed, Hüseyin Efendi b. Abdullah ve gayruhüm.