Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 173 Hüküm no: 127 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa Vakfı’na ait icareteynli menzilin ferağ ve intikali Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Otakçıbaşı mahallesinde sâkine iken bundan akdem vefât eden Âişe Hatun bt. Mustafa’nın sadrî sagīr oğlu Mustafa b. Yusuf’un üvey vâlidesi ve tesviye-i umûruna kıbel-i şer‘den vasiyesi işbu râfi‘atü’l-kitâb Fâtıma Hatun bt. Abdullah meclis-i şer‘-i şerîf-i enverde takrîr-i kelâm <>ve ta‘bîr ani’l-merâm edip Mahmud Ağa Vakfı’ndan icâreteyn-i ma‘lûmeteyn ile müteveffât-ı mezbûrenin taht-ı tasarrufunda olup ba‘de vefâtihâ sagīr-i mezbûreye intikāl-i âdî ile intikāl edip medîne-i mezbûrda Arakıyyecibaşı mahallesinde vâki‘ ma‘lûmü’l-hudûd ve’l-müştemilât müteehhilîn odalarından bir bâb menzil harâba müşrif olup hâsılı harcına vefâ etmediğinden mâ‘adâ sagīr-i mezbûrun ta‘mîr ve termîmine mâl-ı müntakili dahi olmayıp nafaka ve kisveye eşedd-i ihtiyâcı olmağla menzil-i mezbûru ba‘de’l-müzâyede ve inkıtâ‘ı’r-ra‘be bedel-i misli ve ma‘rifet-i mütevellî ile âhara ferâğ ve bedeli istirbâh olmak sagīr-i mezbûr hakkında her vechle enfa‘ ve evlâ olmağla kıbel-i şer‘den bi’l-vesâye izin verilmek matlûbumdur vasiyye-i mezbûrenin kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle [led]e’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi menzil-i mezkûru ba‘de’l-müzâyede ve inkıtâ‘ı’r-ra‘be bedel-i misli ve ma‘rifet-i mütevellî ile âhara ferâğ[a] vasiyye-i mezbûre Fâtıma Hatun’a izin vermeğin mâ-vaka‘a bi’t-taleb ketbolundu. Fi’l-yevmi’s-sâdis min-Cemâziyelâhir li-sene selâsîn ve mi’e ve elf. Şuhûdü’l-hâl: El-Hâc Mehmed Efendi b. İbrahim İmâm, Mustafa Çelebi b. Mehmed, İsmail Çelebi b. Derviş Ali, Mehmed Çelebi b. Halil, Osman Çelebi b. ( ) , Taşçı el-Hâc İbrahim b. Maksud, Osman Beşe b., es-Seyyid Mustafa b. Sefer, es-Seyyid Mehmed b. es-Seyyid Sefer.