Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 213 Hüküm no: 170 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed oğlu Süleyman Ağa’nın terekesinden olan evin zevcesine devri Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî-’de Cezerî Kasımpaşa mahallesinde sâkin iken bundan akdem vefât eden Süleyman Ağa b. Mehmed’in verâseti zevce-i menkûha-i metrûkesi Âişe Hatun bt. Abdullah ile vilâyet-i Anadolu’da Güzelhisar [Gölhisar] kazâsında sâkin li-ebeveyn er karındaşları Ömer Ağa ve Osman Ağa nam kimesnelere münhasıra olduğu şer‘an zâhir ve mütehakkık oldukdan sonra mezbûrân Ömer Ağa ve Osman Ağa’nın hisse-i mevkūfelerini ahz u kabz [ve] zabt u hıfza kıbel-i şer‘den vasî ve kayyım nasb olunan eş-Şeyh Abdullah Efendi b. Mahmud Efendi meclis-i şer‘-i şerîf-i enverde mezbûre Âişe Hatun tarafından husûs-ı âti’l-beyân nasb-ı vekîl olduğu zât-ı mezbûreyi bi’l-ma‘rifet-i şer‘iyye ârifân İsmail Efendi b. el-Hâc Osman ve İbr[a]him Ağa b. Mehmed şehâdetleriyle sâbit ve sübût-ı vekâletine hükm-i şer‘î lâhık olan sadrî oğlu Süleyman Ağa [b.] Mustafa mahzarında bi’l-vesâye ikrâr ve takrîr-i kelâm edip müteveffâ-yı mezbûrun eşyâsı kalîl ve düyûn-ı müsbetesine vefâ etmeyip müteveffâ-yı mezbûrun ile’l-vefât hâricde ta‘mîr olunup yedinde mülk olup medîne-i mezbûrede Arakıyyecibaşı mahallesinde vâki‘ bir tarafdan Ali Efendi menzil bahçesi ve bir tarafdan Osman Ağa [59a] menzili ve bir tarafdan Sefa b. Süleyman yeri ve bir tarafdan tarîk-ı âm ile mahdûd fevkānî bir bâb kebîr oda ve bir sagīr oda ve bir sofa ve bir dehlîz ve tahtanî bir ahur ve bir kenîf ve dört kepenk bakkal dükkanını muhtevî menzil semen-i misli ile bey‘i lâzım gelmeğin menzil-i mahdûd-ı mezkûr izn-i şer‘le bey‘a arz ve sûk-ı sultânîde Münâdî es-Seyyid Ahmed yediyle iki ay mikdârı müzâyede olunup ragabât-ı nâs bi’l-külliye münkatı‘a oldukdan sonra menzil-i mezkûru[n] dâhiliyyesine mutasarrıf olan zevcesi müvekkile-i mezbûre Âişe Hatun üzerine yüz seksen bir guruş karâr edip ziyâdesi ile tâlib-i âharı zuhûr etmeyip ben dahi vesâyetim hasebiyle menzil-i mahdûd-ı mezkûru düyûn-ı müsbetesin edâ için tarâf-ı şer‘den me’zûn olduğum ecilden tarafeynden icâb ve kabûlü hâvî bey‘-i bâtt-ı sahîh-i şer‘î ile bi’l-külliye mezbûre Âişe Hatun’a semen-i misli olan meblağ-ı mezbûr yüz seksen bir guruşa bey‘ ve temlîk ve teslîm eylemekle ol dahi ber-vech-i muharrer iştirâ ve temlîk ve teslîm ve kabûl eyledikden sonra semen-i misli olan meblağ-ı mezbûru müvekkile-i mezbûre yedinden bi’l-vesâye tamâmen alıp kabz eyledim fîmâ-ba‘d menzil-i mahdûd-ı mezkûr mezbûre Âişe Hatun’un mülk-i müşterâsı olmuşdur keyfemâ-teşâ ve tahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi’s-sânî min-Ramazâni’l-mübârek li-sene selasîn ve mi’e ve elf Şuhûdü’l-hâl: Tatar Ahmed Ağa b. Abdurrahman, el-Hâc İbrahim Ağa b. Mehmed, Ahmed Ağa b. Mustafa, Mustafa Efendi b. Hüseyin, es-Seyyid Mustafa b. es-Seyyid Sefer, Ahmed Çelebi b. Abdullah, Mehmed Beşe Kayıkī, Ömer Efendi b. Abdülhay, Ömer Bey.