Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 43 Hüküm no: 5 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Ali’nin küçük oğlu Mehmed Emin’e vasî tayini Medîne-i hazret-i Eyüb el-Ensârî -aleyhi rahmeti’l-Bârî-de Davudağa mahallesinde sâkin iken bundan akdem mecrûhen vefât eden Mustafa Çelebi b. el-Hâc Ali’nin sulbî sagīr oğlu Mehmed Emin’in tesviye-i umûruna bir vasî nasbı lâzım ve mühim olmağın emânet ile ma‘rûfe ve diyânet ile mevsûfe, her vechile vesâyet uhdesinden gelmeğe kādire idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfi‘atü’l-kitâb Hanife Hatun bt. el-Hâc İbrahim’i hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīr-i mezbûrun tesviye-i umûruna vasî nasb ü ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesini kemâ-yenbagī edâya [ta‘ahhüd] ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Cumâdelûlâ sene 1147. Şuhûdü’l-hâl: el-Hâc Hüseyin b. Mehmed, el-Hâc Ömer Ağa b. Mehmed, Ahmed Haseki b. Mustafa, Mustafa Efendi b. Hasan, Mehmed Efendi b. Mustafa.