Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 75 Hüküm no: 36 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun bt. Receb’in varislerinden oğlu Mehmed’in, mirastan payına düşen ½ ev hissesini Şahin Çelebi b. Abdullah’a sattığı Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesinde sâkine iken bundan akdem vefât eden Hadîce Hatun bt. Receb’in verâseti sadrî kebîr oğulları Mehmed ve Ömer’e münhasıra ve tashîh-i mes’eleleri iki sehimden i‘tibâr olunup sihâm-ı mezbûreden bir sehmi mezbûr Mehmed ve bir sehmi mezbûr Ömer’e isâbeti tahakkukundan sonra mezbûr Mehmed meclis-i şer‘-i şerîf-i enverde işbu râfi‘u’l-kitâb Şahin Çelebi b. Abdullah mahzarında ikrâr ve takrîr-i kelâm edüp <> vâlide-i müteveffât-ı mezbûrenin ile’l-vefât yedinde mülkü ve hakkı idüği müsbet olup mahalle-i mezbûrede vâki‘ bir tarafdan Mustafa Çelebi menzili ve bir tarafdan müşteri-i mezbûrun âhar menzili ve bir tarafdan Osman Ağa menzili ve bir tarafdan tarîk-ı âm ile mahdûd fevkānî bir bâb oda ve tahtında bir odayı muhtevî menzilden tashîh-i mezbûr üzere bana isâbet eden bir sehim hissemi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-ı bâtt-ı sahîh-i şer‘î ile mezbûr Şahin Çelebi’ye yüz otuz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr yüz otuz guruşu mezbûr Şahin Çelebi yedinden bi’t-tamam ve’l-kemâl ahz u kabz edüp ba‘de’l-yevm nısf-ı menzil-i mahdûd-ı mezkûr mezbûr Şahin Çelebi’nin mülk-i müşterâsı ve hakk-ı sırfı olmuşdur; keyfe mâ yeşâ ve hasbemâ yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis-aşer min-Recebi’l-mürecceb sene 1147. Şuhûdü’l-hâl: Hammâmî el-Hâc Mehmed b. Ebûbekir, Osman Çelebi b. Ömer, Mustafa Çelebi b. Mehmed, Mehmed Çelebi b. Mustafa, Ali Çelebi b. Mehmed, Halil Ağa b. es-Seyyid Ali, Ahmed Ağa b. es-Seyyid Ali, Ahmed Ağa b. Süleyman, Abdürrezzak b. Ali Efendi, Ömer Beşe b. Mehmed.