Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 76 Hüküm no: 38 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris Çivizâde Abdülbaki Efendi’nin, evini istiğlal yoluyla kardeşi Abdullah’ın küçük çocukları Emetullah ve Ümmügülsüm’e sattığı Husûs-ı âti’l-beyânın mahâllinde ketb ü tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesinde fahrü’l-müderrisîni’l-kirâm Çivizâde Abdülbaki Efendi’nin sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde hemşîreleri Ümmügülsüm ve Zeyneb hanımlar hazır oldukları hâlde mûmâ-ileyh Abdülbaki Efendi meclis-i ma‘kūd-ı mezkûrda karındaşı merhûm Abdullah Efendi’nin sulbiye sagīre kızları Emetullah ve Ümmügülsüm’ün vâlideleri ve tesviye-i emirlerine kıbel-i şer‘den mansûbe vasiyyeleri olan Emine Hatun’un babası ve tarafından vekîl-i müsecceli işbu râfi‘u’l-kitâb el-Hâc Süleyman Ağa b. Mehmed mahzarında ikrâr ve takrîr-i kelâm edüp yedimde mülküm olup mahalle-i mezbûrede vâki‘ bir tarafdan leb-i deryâ ve bir tarafdan hemşîreleri[m] mezbûretân Zeyneb ve Ümmügülsüm hanımlar <> mülkü ve bir tarafdan Desterecizâde Mehmed Efendi’de rehin olan âhar mülküm ve bir tarafdan tarîk-ı âm ile mahdûd büyût-ı adîdeyi muhtevî mülk menzil-i müfrezimi müvekkile-i mezbûre Emine Hatun’a bin yüz seksen guruşa bi-tarîkı’l-istiğlâl bey‘ ve teslîm edüp ol dahi sagīretân-ı mezbûretânın mâllarıyla iştirâ ve tesellüm ve kabûl ve kabz eylediğinden [14a] sonra semeni olan meblağ-ı mezbûr bin yüz seksen guruşu müvekkile-i mezbûre Emine Hatun yedinden bi’t-tamam ve’l-kemâl alıp kabz edüp ba‘dehû müvekkile-i mezbûre Emine Hatun menzil-i mahdûd-ı mezkûru gıbbe’t-tahliyeti’ş-şer‘iye ve’t-takābuzı’l-mer‘î târih-i kitâbdan bir sene tamamına değin yüz altmış sekiz guruşa bana îcâr ve teslîm edüp ben dahi ber-vech-i muharrer istîcâr ve kabûl eyledim dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Mehmed ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti Recebi’l-mürecceb sene 1147. Şuhûdü’l-hâl: Fahrü’l-kuzât Ahmed Efendi b. Bektaş, Destereci <> Mehmed Efendi b. Ali, Yahya Efendi b. İmâm-ı Servi, Abdullah Efendi b., Mustafa Çelebi b. Abdullah.