Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 145 Hüküm no: 97 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadabad köyü ahalisinden Mustafa Çelebi b. Kaytas’tan miras kalan ev, bahçe, ahır, kereste ve arı kovanlarının, Başmuhasebeci Feyzullah Bey b. Nuh Efendi’ye satıldığı Havâss-ı Refî‘a kazâsına tâbi‘ Sadâbad [nâm] karyede sâkin iken bundan akdem vefât eden Mustafa Çelebi b. Kaytas’ın verâseti zevce-i menkûha-i metrûkesi Ümmühani Hatun bt. Abdullah ile sulbiye kebîre kızları Fâtıma ve Âişe ve Sâliha ve Meryem’e ve sadriye sagīre kızı Hafize’ye münhasıra ve tashîh-i mes’eleleri kırk sehimden i‘tibâr olunup sihâm-ı mezbûreden beş sehmi zevce-i mezbûreye ve yedişer sehmi kızları mezbû[r]âtdan her birine isâbeti tahakkukundan sonra zâtları ta‘rîf-i şer‘î ile mu‘arrefe olan mezbûrât Ümmühani ve Fâtıma ve Âişe ve Sâliha ve Meryem ile sagīre-i mezbûrenin bâ-hüccet-i şer‘iye vasîsi olan el-Hâc Ahmed b. Hüseyin meclis-i şer‘-i şerîf-i enverde işbu sahib-i kitâb-ı sıhhat-nisâbın sahibi olup hâlâ Devlet-i Aliyye’de Başmuhâsebeci mîr-i muhterem sa‘âdetlü Feyzullah Bey b. el-merhûm Nuh Efendi hazretleri taraf-ı bâhirü’ş-şerîflerinden tasdîka vekîl-i sâbitü’l-vekâleleri olan İbrahim Ağa b. Hasan mahzarında her biri bi’l-verâse ve bi’l-vesâye ikrâr ve takrîr-i kelâm edüp mûrisimiz müteveffâ-yı mezbûrun ile’l-vefât yedinde mülk ve hakkı idüği müsbet olup sâlifü’z-zikr Sadâbad karyesinde vâki‘ bir tarafdan el-Hâc Bali vereseleri mülkü ve bir tarafdan Cığalzâde mülkü ve bir tarafdan tarîk-ı hâs ve bir tarafdan tarîk-ı âm ile mahdûd bir bâb fevkānî oda ve bir matbah ve bir sofa ve bir kilâr ve dehliz ve iki bâb tahtânî oda ve hamam ve fırın ve tahtında ahır ve iki kenîf ve dört aded su kuyusunu ve eşcâ[r-ı] mütenevvi‘a-i müsmire ve gayr-ı müsmireyi muhtevî bahçe ile ittisâlinde vâki‘ bir canavar ahırı ve samanhâneden verese-i kibârın hisselerini âhara bey‘ murâd eylediklerinde sagīre-i mezbûrenin hissesi ifrâz mümkün olmadığından mâ‘dâ hâsılı harcına vefâ etmeyip nafaka ve kisveye dahi eşedd-i ihtiyâcı olmağla bi’l-izni’ş-şer‘î verese-i kibârın hisseleriyle ma‘an <> menzil ve bahçe ve ahır ile müteveffâ-yı mezbûrun terekesinden ma‘lûmü’l-mikdâr kereste ve otuz yedi zenbûr kovanı sûk-ı sultânîde [34b] ve mecma‘-ı nâs olan mahallerde üç ay mikdârı müzâyede olunup ragabât-ı nâs bi’l-külliye munkatı‘a oldukdan sonra müvekkil-i müşârün-ileyh Feyzullah Bey hazretleri üzerinde sekiz yüz guruşda karâr edüp ziyâde ile tâlib-i âhar zuhûr etmeyip [ve meblağ-ı mezbûr] sâlifü’z-zikr menzil ve bahçe ve ahırın el-yevm semen-i misli idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın kereste ve …? ile menzil ve bahçe ve ahırı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile bi-safkatin vâhidetin semen-i misli olan meblağ-ı mezbûr sekiz yüz guruşa müvekkil-i müşârün-ileyh Feyzullah Bey hazretlerine her birimiz bi’l-verâse ve bi’l-vesâye bey‘ ü temlîk ve teslîm eylediğimizde onlar dahi ber-vech-i muharrer iştirâ ve temellük ve tesellüm ve kabûl ve kabz eylediklerinden sonra semen-i misli olan mebgali [meblağ-ı] mezbûr sekiz yüz guruşu her birimiz bi’l-verâse bi-kadri’l-hısas alıp müvekkil-i müşârün-ileyh Feyzullah Bey hazretleri yed-i şerîflerinden alıp kabz eyledik; ba‘de’l-yevm kereste ve zenbûr ile menzil ve bahçe ve ahır müvekkil-i müşârün-ileyh hazretlerinin mülk-i müşterâsı olmuşdur; keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ min-Zilhicceti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: Ahmed Efendi b. Kethud[â], Hüseyin Efendi b. Bostânî, el-Hâc Ahmed b. Bostânî, es-Seyyid Süleyman Çelebi b. Sinan, es-Seyyid Mustafa Efendi b. İmâm, Mustafa Efendi b. Hüseyin, es-Seyyid Ahmed Efendi b. el-mukayyid, Yahya Efendi b. Mustafa, Mehmed Efendi b. Mustafa.