Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 170 Hüküm no: 121 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımpaşa Küçük Piyale Paşa Mahallesi ahalisinden olup Anadolu’da Azaz kazasında vefat eden Mehmed Ağa b. Ömer Paşa’nın küçük kızı Ayşe’ye nafaka tayini Mahrûse-i Galata muzâfâtından kasaba-i Kasımpaşa’da Küçük Piyale Paşa mahallesi ahâlîsinden iken bundan akdem <> vilâyet-i Anadolu’da Azâz [A‘zâz] kazâsında müsâfiren sâkin iken bundan [akdem] vefât eden Mehmed Ağa b. Ömer Paşa’nın sulbiye sagīre kızı Âişe’nin vâlidesi ve tesviye-i umûruna bâ-hüccet-i şer‘iye vasiyyesi olup medîne-i hazret-i Ebî Eyüb el-Ensârî’de ( ) mahallesinde sâkine işbu râfi‘atü’l-kitâb Emine Hatun bt. Ali Efendi meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasiyyesi olduğum sagīre-i mezbûrenin nafaka ve kisve-bahâya eşedd-i ihtiyâcı olmağla babası müteveffâ-yı mezbûrdan müntakıl mâlından kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasiyye-i mezbûrenin kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīre-i mezbûrenin babası müteveffâ-yı mezbûrdan müntakıl mâlından beher yevm yirmi akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisve-bahâsına harc ve sarfa ve lede’l-iktizâ istidâneye ve inde’z-zafer mâlına rücû‘a vasiyye-i mezbûre[ye] izin vermeğin mâ-vaka‘a bi’t-taleb ketb olundu. Fî-gurreti Zilhicceti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: Fahrü’l-müderrisîni’l-kirâm Mehmed Said Efendi b. Ahmed, fahrü’l-kuzât es-Seyyid Süleyman Efendi b. Mehmed, Ahmed Efendi b. Ali Efendi, Molla Mustafa b. Mehmed Osman, İsmail Beşe b. Mustafa, Süleyman Bey b., es-Seyyid Ahmed b. es-Seyyid Mustafa, Mustafa Çelebi b. Abdullah.