Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 176 Hüküm no: 127 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Bey b. Mehmed’in küçük kızı Hatice’nin İlyas Vakfı’ndan kiralı evdeki 1/3 hissesinin başkasına devrine mahkeme tarafından izin verildiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Kiremidci Süleyman mahalle[si] ahâlîsinden iken bundan akdem vilâyet-i Anadolu’da Karakulak nâm mevzi‘de bi-kazâillâhi te‘âlâ fevfât [vefât] eden Musâhib Paşazâde demekle ma‘rûf Abdullah Bey b. el-merhûm Mehmed Bey’in sulbiye sagīre kızı Hadice’nin min-kıbeli’l-ümm ceddesi ve tesviye-i umûruna vasiyyesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb fahrü’l-muhadderât Emetullah Hanım bt. el-merhûm Musâhib Mustafa Paşa meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp el-Hâc İlyas Vakfı’ndan icâreteyn-i ma‘lûmeteyn ile müteveffâ-yı mûmâ-ileyh Abdullah Bey’in ile’l-vefât taht-ı tasarrufunda olup ba‘de vefâtihî sulbiye kebîre kızı Emine Hanım ile zevce-i menkûha-i metrûkesi Rukiye Hanım’ın batnı[n]da müste[b]în hamle ve sagīre kızı Hadîce Hanım’a intikāl-i âdî ile intikāl edüp mahmiye-i İstanbul’da Ayvansaray dâhilinde Koca Mustafa Paşa mahallesinde vâki‘ lede’l-ahâlî ve’l-cîrân ma‘lû[mü]’l-hudûd ve’l-müştemilât bir bâb menzilden vasiyyesi olduğum sagīre-i mezbûrenin sülüs hissesi ifrâz mümkün olmadığından mâ‘dâ hâsıl[ı] harcına vefâ etmeyip harâba müşrif olmağın ta‘mîr ve termîmine mal-ı müntakılesi olmayıp nafaka ve kisveye dahi eşedd-i ihtiyâcı olmağla menzil-i mezkûrda olan sagīre-i mezbûrenin sülüs hissesi ba‘de’l-müzâyede ve inkıtâ‘ı’r-rağbe bedel-i misli ve ma‘rifet-i mütevellî ile âhara ferâğ ve bedeli istirbâh olunmak sagīre-i mezbûre hakkında her vechile enfa‘ ve evlâ olmağın hisse-i mezkûru âhara ferâğ ve bedel[i] istirbâh olunmak üzere kıbel-i şer‘den izin verilmek matlûbumdur dedikde vasiyye-i mezbûrenin kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīre-i mezbûrenin menzil-i mezkûrda olan sülüs hissesini ba‘de’l-müzâyede ve inkıtâ‘ı[‘r-rağbe] bedel-i misli ve ma‘rifet-i mütevellî ile [43b] âhara ferâğ ve bedeli istirbâh olunmak üzere vasiyye-i mezbûre Emetullah Hanım’a izin vermeğin mâ-vaka‘a bi’t-taleb ketb olundu. Fi’l-yevmi’r-râbi‘-aşer min-Rebî‘i’l-âhir li-seneti semân ve erba‘în ve miete ve elf. Şuhûdü’l-hâl: Mustafa Efendi b. Hüseyin, Ahmed Ağa b. Mehmed, Molla Abdullah b. Hasan, es-Seyyid Mehmed b. es-Seyyid Mustafa, Mehmed Ağa b. Hasan, Molla Ali Efendi b. Ahmed ve gayruhum.