Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 218 Hüküm no: 160 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun bt. İbrahim’in varislerinden Ahmed Ağa b. Mehmed’in, miras hissesini aldığı Husûs-ı âti’l-beyânın mahâllinde ketb ü tahrîr[i] iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Kiremidci Süleyman mahallesinde sâkine iken bundan akdem vefât eden Fâtıma Hatun bt. İbrahim’in hayatında sâkine olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffât-ı mezbûrenin verâseti zevc-i metrûkü İsmail Beşe b. Abdullah ile vâlidesi Rukiye Hatun bt. el-Hâc Ali Odabaşı’ya ve asebe-i nesebiye cihetinden li-ebeveyn ammi oğlu Ahmed Ağa b. Mehmed’e münhasıra <> ve müteveffât-ı mezbûrenin sülüs-i vasiyyeti olmağla tashîh-i mes’elesi dokuz sehimden i‘tibâr olunup sihâm-ı mezbûreden üç sehmi zevc-i mezbûr İsmail Beşe’ye ve iki sehmi vâlidesi mezbûre Rukiye Hatun’a ve bâkī bir sehmi mezbûr Ahmed Ağa’ya isâbeti tahakkukundan sonra mezbûr Ahmed Ağa’nın oğlu ve tarafından husûs-ı âti’l-beyânda vekîl olduğu es-Seyyid Mehmed Ağa b. Mustafa ve Osman Ağa b. Abdullah şehâdetleriyle şer‘an sâbit ve sübût-i vekâletine hükm-i şer‘î lâhık olan Yusuf Çelebi meclis-i ma‘kūd-ı mezkûrda tereke-i müteveffât-ı mezbûre[ye] bi’l-verâse vâzı‘ayi’l-yed olan işbu râfi‘ayi’l-kitâb zevc-i mezbûr İsmail Çelebi ile vâlidesi mezbûre Rukiye Hatun mahzarlarında bi’l-vekâle [54b] ikrâr ve takrîr-i kelâm edüp müteveffât-ı mezbûre Fâtıma Hatun’un terekesi tahrîr ve ba‘de ihrâci’l-masârif ve’d-düyûn ber-mûceb-i defter-i kassâm-ı askerî tashîh-i mezbûr üzere babam müvekkil-i mezbûrun bir sehim hissesine isâbet eden üç bin iki yüz yirmi iki akçeyi terekeden olmak üzere mezbûrân İsmail Çelebi ve Rukiye Hatun [bana] def‘ ve teslîm ben dahi ber-vech-i muharrer meblağ-ı mezbûru yedlerinden bi’l-vekâle alıp kabz edüp meblağ-ı mezbûr üç bin iki yüz yirmi iki akçeden mezbûrân İsmail ve Rukiye yedlerinde ve zimmetlerinde babam müvekkil-i mezbûrun bir akçe ve bir habbe hakkı kalmayıp ba‘de’l-yevm müteveffât-ı mezbûrenin terekesinden hâric-i ez-defter kalîl ve kesîr ve celîl ve hakīr hukūk-ı ma‘lûme ve mechûle mirasa müte‘allika da‘vâdan mezbûrân İsmail Çelebi ve Rukiye Hatun’un zimmetlerini bi’l-vekâle ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr Mustafa Çelebi ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 3 min-Recebi’l-ferd sene 1148. Şuhûdü’l-hâl: Osman Odabaşı b. Abdullah, es-Seyyid Mehmed Ağa b. es-Seyyid Mustafa, Ahmed Efendi b. Mustafa, Hasan Çelebi b. Ali, Ahmed Çelebi b. Mehmed, Molla Mehmed b. Bektaş.