Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 223 Hüküm no: 164 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun bt. Hüseyin’in küçük oğlu Hüseyin’e nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Otakcıbaşı mahallesinde sâkine iken bundan akdem vefât eden Rukiye Hatun bt. Hüseyin’in sulbî sagīr oğlu Hüseyin’in tesviye-i umûruna kıbel-i şer‘den bâ-hüccet-i şer‘iye vasîyy-i mansûbu olan işbu râfi‘u’l-kitâb Abdülbaki Beşe b. Ali meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîsi olduğum sagīr-i mezbûrun vâlidesi müteveffât-ı mezbûreden müntakıl mal-ı mevrûsundan kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīr-i mezbûrun vâlidesi müteveffât-ı mezbûreden müntakıl mal-ı mevrûsundan beher yevm beş akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve-bahâsına harc ve sarfa ve lede’l-iktizâ istidâneye ve inde’z-zafer mâlına rücû‘a vasîyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’r-râbi‘-aşer min-Cumâdelâhir li-seneti semân ve erba‘în ve miete ve elf. Şuhûdü’l-hâl: Eş-şâhidûnü’s-sâbıkūn.