Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 226 Hüküm no: 167 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Bey b. Mehmed’in, Ayşe Hatun Vakfı’ndan kiralı evinin küçük oğlu Abdullah Bey’e ait 1/3 hissesinin başkasına devrine mahkeme tarafından izin verildiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Kiremidci Süleyman mahallesi ahâlîsinden olup vilâyet-i Anadolu’da Karakulak nâm mevzi‘de bi-kazâillâhi te‘âlâ vefât eden Musâhib Paşazâde demekle ma‘rûf Abdullah Bey b. el-merhûm Mehmed Bey’in sulbî sagīr oğlu Abdullah Bey’in min-kıbeli’l-ümm ceddesi ve tesviye-i umûruna bâ-hüccet-i şer‘iye vasiyyesi olup zâtı ta‘rîf-i şer‘î ile mu‘arrefe olan [işbu] bâ‘isetü’l-kitâb fahrü’l-muhadderât Emetullah Hanım bt. Musâhib Mustafa Paşa meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp Merhûme Âişe Hatun Vakfı’ndan icâreteyn-i ma‘lûmeteyn ile müteveffâ-yı mûmâ-ileyh Abdullah Bey’in ile’l-vefât taht-ı tasarrufunda olup ba‘de vefâtihî sulbî sagīr oğlu Abdullah Bey’in ve sulbiye kebîre kızı Emine Hanım ve sagīre kızı Hadîce Hanım’a intikāl-i âdî ile intikāl edüp medîne-i mezbûrede Nazperver mahallesinde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât menzilden vasiyyesi olduğum sagīr-i mezbûr Abdullah Bey’in sülüs hissesi ifrâz mümkün olmadığından mâ‘dâ harâba müşrif olup [56b] ta‘mîr ve termîmine mal-ı müntakılesi olmayıp nafaka ve kisveye eşedd-i ihtiyâcı olmağla menzil-i mezkûrda olan sagīr-i mezbûrun sülüs hissesi ba‘de’l-müzâyede ve inkıtâ‘ı’r-rağbe bedel-i misli ve ma‘rifet-i mütevellî ile âhara ferâğ ve bedeli istirbâh olunmak sagīr-i mezbûr hakkında her vechile enfa‘ ve evlâ olmağın hisse-i mezkûru âhara ferâğa kıbel-i şer‘den izin verilmek matlûbumdur dedikde vasiyye-i mezbûrenin kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri menzil-i mahdûd-ı mezkûrda olan sagīr-i mezbûrun sülüs hissesini ba‘de’l-müzâyede ve inkıtâ‘ı’r-rağbe bedel-i misli ve ma‘rifet-i mütevellî ile âhara ferâğ ve bedeli istirbâh olunmak üzere vasiyye-i mezbûre Emetullah Hanım’a izin vermeğin mâ-vaka‘a bi’t-taleb ketb olundu. Fi’l-yevmi’r-râbi‘ ve’l-işrîn min-Cumâdelâhir li-seneti semân ve erba‘în ve miete ve elf. Şuhûdü’l-hâl: Eş-şâhidûnü’s-sâbıkūn.