Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 258 Hüküm no: 197 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. İbrahim’in evinin Ahmed Ağa b. Mustafa ve eşi Fatma Hatun’a satıldığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Fethi Çelebi mahallesinde sâkin iken bundan akdem vefât eden Mehmed Efendi b. İbrahim’in hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti zevce-i menkûha-i metrûkesi Kerîme Hatun bt. Mehmed ile li-ebeveyn karındaşı Mustafa Çelebi’ye ve li-ebeveyn kız karındaşları Fâtıma ve Hamide hatunlara münhasıra ve tashîh-i mes’eleleri on altı sehimden i‘tibâr olunup sihâm-ı mezbûreden dört sehmi zevcesi mezbûre Kerîme Hatun’a ve altı sehmi karındaşı merkūm Mustafa Çelebi’ye ve üçer sehmi kız karındaşları mezbûretândan her birine isâbeti tahakkukundan sonra mezbûre Kerîme Hatun tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iye ile ârifân Ali Çelebi b. Maksud ve el-Hâc Mehmed Efendi b. İbrahim şehâdetleriyle şer‘an sâbit ve sübût-i vekâletine hükm-i şer‘î lâhık olan Mustafa Çelebi b. Ali ile mezbûrûn Mustafa Çelebi ve Fâtıma ve Hamide hatunlar meclis-i ma‘kūd-ı mezkûrda işbu râfi‘ayi’l-kitâb Ahmed Ağa b. Mustafa ve zevcesi Fâtıma Hatun bt. ( ) mahzarlarında ikrâr ve takrîr-i kelâm edüp mûrisimiz müteveffâ-yı mezbûrun ile’l-vefât yedinde mülk ve hakkı idüği müsbet olup mahalle-i mezbûrede vâki‘ bir tarafdan Kurşunî Mustafa Ağa mülkü ve iki tarafdan Hüseyin Efendi Vakfı ve bir tarafdan tarîk-ı âm ile mahdûd iki bâb fevkānî oda ve bir sofa ve dehliz ve tahtında bir bâb oda ve bir sofa ve bir su kuyusu ve havluyu muhtevî mülk menzilden tashîh-i mezbûr üzere hisse-i şâyi‘alarımızı tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î üzere mezbûr Ahmed Ağa ile zevcesi mezbûre Fâtıma Hatun’a ale’l-iştirâki’s-seviy üç yüz guruşa her birimiz bi’l-vekâle ve bi’l-verâse bey‘ ve temlîk ve teslîm eylediğimizde onlar dahi ber-vech-i muharrer iştirâ ve temellük ve tesellüm ve kabûl ve kabz eylediklerinden sonra semeni olan meblağ-ı mezbûr üç yüz guruşu mezbûr Ahmed Ağa ve zevcesi mezbûre Fâtıma Hatun yedlerinden her birimiz bi-kadri’l-hısas alıp kabz eyledik; ba‘de’l-yevm menzil-i mahdûd-ı mezkûrda [olan] hisse-i şâyi‘alarımız merkūm Ahmed Ağa ile zevcesi mezbûre Fâtıma Hatun’un ale’l-iştirâki’s-seviy mülk-i müşterâları ve hakk-ı sırfları olmuşdur; keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb tahrîr ba‘dehû ma‘an ba‘s olunan Çukadâr es-Seyyid Yakub ile Muhzır es-Seyyid Mehmed meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 9 min-Şevvali’l-mükerre[m] sene 1148. Şuhûdü’l-hâl: el-Hâc Mehmed Efendi b. İmâm-ı mahalle-i mezbûre, Molla Hüseyin b. Mahmud, Ali Çelebi b. Maksud, Osman Çelebi b. Musa, Ahmed Efendi b. Mustafa.