Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 266 Hüküm no: 201 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hatun bt. Abdullah’ın Van’da ikamet etmekte olan varisi İsmail b. İbrahim’in miras hissesi için vasî tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Sof[u]lar mahallesinde sâkine iken bundan akdem vefât eden Râbia Hatun bt. Abdullah’ın asabe-i nesebiye cihetinden vârisi olup vilâyet-i Van’da sâkin el-Hâc İsmail b. el-Hâc İbrahim’in hisse-i mevkūfesini ahz u kabz [ve] zabt u hıfza kıbel-i şer‘den vasî ve kayyım nasb[ı] lâzım ve mühim olmağın emânet ile ma‘rûfe ve diyânet ile mevsûfe, her vechile vesâyet uhdesinden gelmeğe kādire idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan kız karındaşı işbu râfi‘atü’l-kitâb Âmine Hatun bt. el-Hâc İbrahim’i hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri mezbûr el-Hâc İsmail’in hisse-i irsiyesini ahz u kabz [ve] zabt u hıfza <> vasî ve kayyım nasb ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 13 min-Şevvali’l-mükerrem sene 1148. Şuhûdü’l-hâl: Mustafa Efendi b. Nurullah, Yahya Çelebi b. Mustafa, es-Seyyid Mehmed b. es-Seyyid Mustafa, Ahmed Efendi b. Mustafa ve gayruhum.