Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 310 Hüküm no: 237 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Defterdar Kara Süleyman Mahallesi ahalisinden Refikî Mehmed b. Receb’in, vasiyetini yerine getirmek üzere Seyyid Ahmed Ağa b. Mehmed’i vasî tayin ettiğine hükmolunduğu Husûs-ı âti’l-beyânın mahâllinde istimâ‘ ve tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb-i Ensârî -aleyhi rahmetü Rabbihi’l-Bârî-de Defterdâr Kara Süleyman mahallesinde vâki‘ es-Seyyid Ahmed Ağa b. Mehmed’in sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî eyledikde mahalle-i mezbûre ahâlîsinden olup bu sene-i mübârekede hâcc-ı şerîfden gelir iken Şâm-ı şerîfde vefât eden Refîkī el-Hâc Mehmed b. Receb’in ber-vech-i âtî vasîyy-i muhtârı olduğunu iddi‘â eden işbu râfi‘u’l-kitâb mezbûr es-Seyyid Ahmed Ağa meclis-i ma‘kūd-ı mezkûrda müteveffâ-yı mezbûrun hâletesi ve zî-rahm cihetinden hasran vârisi olmağla terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Âişe Hatun bt. Mehmed mahzarında üzerine da‘vâ ve takrîr-i kelâm edüp [müteveffâ-yı mezbûr Refîkī el-Hâc Mehmed b. Receb b. Abdullah târih-i kitâbdan bir sene mukaddem,] ben bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olundukdan sonra [82b] cemî‘ mâlımın sülüsü ifrâz ve sülüs-i mezbûrdan beş Mushaf-ı Şerîf alınup akribâmdan olanlara verile ve yine sülüs-i mezkûrdan bir Tefsîr-i Kādî Beyzâvî ve bir Buhâ[r]î ve bir Meşârik-i İbn-i Melek ve bir Şir‘a Şerhi ve bir Seyyid Alizâde ve bir Mutavvel ve bir Hasan Çelebi ale’l-Mutavvel ve bir Muğni’l-lebîb alınup akribâmdan es-Seyyid Mustafa’ya verile ve sülüs-i mezbûrdan her ne bâkī kalırsa vücûh-ı birre harc ve sarf oluna deyü huzûr-ı Müslimînde vasiyet ve tenfîzine beni vasîyy-i muhtâr nasb ve ta‘yîn edüp ben dahi ber-vech-i muharrer vesâyet-i mezbûreyi muvâcehesinde ba‘de’l-kabûl mezbûr Refîkī el-Hâc Mehmed musırrân alâ-îsâihî fevt olmağla tenfîz-i vesâyâ murâd eylediğimde mezbûre Âişe mâni‘a olur, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahalle-i mezbûrede sâkin İbrahim Efendi b. Abdullah ve Ali Çelebi b. Ömer nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd, fi’l-hakīka müteveffâ-yı mezbûr Refîkī el-Hâc Mehmed b. Receb b. Abdullah târih-i kitâbdan bir sene mukaddem ben bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olundukdan sonra cemî‘ mâlımın sülüsü ifrâz ve sülüs-i mezbûrdan beş Mushaf-ı Şerîf alınup akribâmdan olanlara verile ve yine sülüs-i mezkûrdan bir Tefsîr-i Kādî Beyzâvî ve bir Buhârî ve bir Meşârik-i İbn-i Melik ve bir Şir‘a Şerhi ve bir Seyyid Alizâde ve bir Mutavvel ve bir Hasan Çelebi ale’l-Mutavvel ve bir Muğni’l-lebîb alınup akribâmdan es-Seyyid Mustafa’ya verile ve sülüs-i mezbûrdan her ne bâkī kalırsa vücûh-ı birre harc ve sarf oluna deyü vasiyet ve tenfîzine işbu müdde‘î-i mezbûr es-Seyyid Ahmed Ağa’yı huzûrumuzda vasîyy-i muhtâr nasb ve ta‘yîn edüp ol dahi ber-vech-i muharrer vesâyet-i mezbûreyi muvâcehesinde ba‘de’l-kabûl mezbûr Refîkī el-Hâc Mehmed musırrân alâ-îsâihî vefât eyledi; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr Hüseyin Çelebi b. Ebîbekir ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Rebî‘ülevvel sene 1149. Şuhûdü’l-hâl: el-Hâc Hüseyin b. Ömer, es-Seyyid Mustafa b. es-Seyyid Ahmed, Berber Mustafa Çelebi b. el-Hâc Mehmed Cemal, es-Seyyid Ahmed b. es-Seyyid Mehmed, Mehmed Efendi [b.] Bektaş.