Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 47 Hüküm no: 1 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Ahmed’in terekesinden çocukları Rukiye ve Emine’ye nafaka verilmesi Medîne-i Hazret-i Ebî Eyyüb el-Ensârî -aleyhi rahmeti’l-bârî-’de Bıçakçı Ferhad Mahallesiʼnde sâkin iken bundan akdem vefât eden Ali Ağa b. Ahmed’in sulbiye sagīre kızları Rukiye ve Emine’nin vâlideleri ve tesviye-i emirlerine kıbel-i şer‘den mansûbe vasiyyeleri olan işbu râfiʻatü’l-kitâb Fâtıma Hatun bt. Mehmed meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasiyyeleri olduğum sagīretân-ı mezbûretânın nafaka ve kisveye eşedd-i ihtiyâçları olmağla babaları müteveffâ-i mezbûrdan müntakil mâllarından herbirine kadr-i ma‘rûf nafaka ve kisve-bahâ farz ve takdîr olunmak matlûbumdur dedikde vasiyye-i mezbûrenin kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīretân-ı mezbûretânın babaları müteveffâ-i mezbûrdan müntakil mâllarından herbirine yevmî ikişer para nafaka ve kisve-bahâ farz ve takdîr buyurup meblağ-ı mefrûz-ı mezbûru sagīretân-ı mezbûretân Rukiye ve Emine’nin nafaka ve kisve-bahâlarına harc u sarfa ve lede’l-iktizâ istidâneye ve inde’z-zafer mâllarına rücû‘a vasiyye-i merkūme Fâtıma Hatun’a izin vermeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Zilhicceti’ş-şerîfe li-sene sebʻa ve hamsîn ve mi’e ve elf. Şuhûdü’l-hâl: Abdullah Efendi b. Hasan, Hüseyin Ağa b. el-Hâc Hasan, İsmail Çelebi b. Hüseyin, Osman Ağa b. Ramazan, Mustafa b. Musa ve gayruhum.