Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 48 Hüküm no: 3 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerban adlı zimmînin ölen kardeşi Doğuş v. Yorgi’nin terekesinden miras hissesini almak üzere Dimitri v. Yorgi’yi vasi ve kayyım tayin etmesi Havâss-ı Refîʻa kazâsına tâbi‘ Karfa nâm karyede mütemekkin iken bundan akdem hâlik olan Doğuş v. Yorgi’nin li-ebeveyn karındaşı olup vilâyet-i Rumeli’nde Fener nâhiyesine tâbi‘ Nihor nâm karyede mütemekkin Şerban nâm zimmînin hisse-i irsiyyesin ahz u kabz, zabt u hıfza kıbel-i şer‘den bir vasî ve kayyım nasbı lâzım ve mühim olmağın emânet ile ma‘rûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan mezbûr Şerban’ın ammisi işbu râfiʻü’s-sifr Dimitri v. Yorgi nâm zimmîyi hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri mersûm Şerban’ın hisse-i irsiyyesini ahz u kabz zabt u hıfza vasî ve kayyım nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-âşir min-Muharremi’l-harâm li-sene semân ve hamsîn ve mi’e ve elf. Şuhûdü’l-hâl: Lütfullah Beşe b. Mehmed, Ali Beşe b. Receb, es-Seyyid Mehmed Çelebi b. es-Seyyid Mustafa, Ömer Çelebi b. Ali, Mehmed Çelebi b. Ahmed ve gayruhum. Kated v. Yako, Foti v. Arslan, Yorgi v. Yorgi, Neç v. Kosta.