Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 49 Hüküm no: 5 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bıçakçı Ferhad Mahallesi’nden Tahmîs Ağası Ali Ağa’nın hayattayken evini kızı Hadice Hatun’a hibe etmiş olduğu Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Bıçakçı Ferhad Mahallesiʼnde sâkin iken bundan akdem vefât eden sâbıkā Tahmîs ağası olan Ali Ağa b. Ahmed’in hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun sulbiye kebîre kızı Hadice Hatun’un zevci ve tarafından husûs-ı âti’l-beyânda vekîl olduğu zât-ı mezbûreyi bi’l-ma‘rifeti’ş-şer‘iyye ârifân olan Hüseyin Ağa b. Hasan ve İsmail Çelebi b. Hüseyin şehâdetleriyle şer‘an sâbit ve sübût-ı vekâletine hükm-i şer‘î lâhık olan Osman Ağa b. Ramazan meclis-i ma‘kūd-ı mezkûrda müteveffâ-i mezbûrun zevcesi ve sagīretân Rukiye ve Emine’nin vâlideleri ve tesviye-i emirlerine mansûbe vasîleri olup zâtı zeyl-i kitâbda mastûrü’l-esâmî Müslimîn ta‘rîfleriyle mu‘arrefe olan Fâtıma Hatun bt. Mehmed mahzarında üzerine da‘vâ ve takrîr-i kelâm edip mahalle-i mezbûrede vâki‘ bir tarafdan Veznedârzâde Ahmed Ağa menzili ve bir tarafdan sâbıkā şehremîni olan Mehmed Efendi bahçesi ve iki tarafdan tarîk-i âm ile mahdûd hâriciyesinde iki bâb oda ve dehlîz ve bir sofa ve bir su kuyusu ve dâhiliyesinde iki bâb fevkānî oda ve bir cihânnümâ ve tahtında kömürhâne ve bir hamam ve bir kenîf ve bir mikdâr bahçeyi muhtevî mülk menzilini müteveffâ-i mezbûr Ali Ağa b. Hüseyin hâl-i hayâtında ve kemâl-i akl-ı sıhhatinde yedinde mülkü olduğu hâlde fevtinden bir sene mukaddem ba‘de’t-tahliyyeti’ş-şer‘iyye kızı müvekkile-i mezbûre Hadice Hatun’a huzûr-ı Müslimîn’de hibe-i sahîha-i şer‘iyye ile hibe ve temlîk ve teslîm edip ol dahi ber-vech-i muharrer meclis-i hibede ittihâb ve temellük ve tesellüm ve kabz edip ol vechile menzil-i mahdûd-ı mezkûr târîh-i mezbûrdan beri müvekkile-i mezbûrenin mülk-i mevhûbesi olmuş iken vasiyye-i mezbûre Fâtıma Hatun terekeden olmak üzere bi-gayr-ı hakkın vaz‘-ı yed eder, suâl olunup kasr-ı yedine tenbîh olunmak matlûbumdur dedikde gıbbe’s-suâl vasiyye-i mezbûre Fâtıma Hatun zikr olunan menzil-i mahdûd-ı mezkûre tereke-i müteveffâdan olmak üzere vaz‘-ı yedini ikrâr ve ber-vech-i muharrer müteveffâ-i mezbûr müvekkile-i mezbûreye hibe ve temlîk ve teslîm eylediğini inkâr edicek, vekîl-i mezbûr Osman Ağa’dan müdde‘âsını mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûr sâkinlerinden el-Hâc Hüseyin b. Mehmed ve İbrahim Ağa b. Mehmed nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mezbûr Ali Ağa b. Ahmed b. Hasan’ın hayâtında yedinde mülkü olup mahalle-i mezbûrede vâki‘ bir tarafdan Veznedar Ahmed Ağa menzili ve bir tarafdan sâbıkā şehremîni Mehmed Efendi menzili ve iki tarafdan tarîk-i âmla mahdûd hâriciyesinde iki bâb oda ve dehlîz ve bir sofa ve bir su kuyusu ve dâhiliyesinde iki bâb fevkānî oda ve bir cihânnümâ ve tahtında kömürhâne ve bir hamam ve ber kenîf ve bir mikdâr bahçeyi muhtevî mülk menzilini hâl-i hayâtında ve kemâl-i akl-ı sıhhatinde yedinde mülkü olduğu hâlde fevtinden bir sene mukaddem ba‘de’t-tahliyyeti’ş-şer‘iyye kızı müvekkile-i mezbûre Hadice Hatun’a bizim huzûrumuzda hibe-i sahîha-i şer‘iyye ile hibe ve temlîk ve teslîm edip ol dahi ber-vech-i muharrer meclis-i hibede ittihâb ve temellük ve kabz [2b] ve kabûl eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle baʻde’l-hükm vâki‘ hâli mevlânâ-yı mezbûr mahallinde baʻde’l-ketb ve’t-tahrîr ma‘an baʻs olunan Mollâ Feyzullah b. Rıdvan ve es-Seyyid Mehmed Çelebi b. es-Seyyid Mustafa ile meclis-i şer‘a gelip herbiri alâ-vukū‘ihî inhâ ve takrîr etmeğin hükm-i mezbûr tenfîz olunup mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Zilhicceti’ş-şerîfe li-sene sebʻa ve hamsîn ve mi’e ve elf. Şuhûdü’l-hâl: Sâbıkā Diyarbekir Kādısı Feyzullah Efendi, Abdullah Efendi b. Hüseyin el-İmâm, Mustafa Efendi b. Musa, Ali Efendi b. Salih, Osman Efendi b. Mehmed, es-Seyyid Mehmed Çelebi b. es-Seyyid Mustafa, İbrahim Çelebi b. Mehmed, Mollâ Feyzullah b. Rıdvan, Hüseyin Çelebi b. Hasan, İsmail Çelebi b. Hasan.