Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 97 Hüküm no: 50 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katerina bt. Kosta’nın ölümüyle oğlu Bakam’a Mihal v. Yorgi’nin vasi tayin edilmesi Havâss-ı Refîʻa kazâsına tâbi‘ Karfa karyesinde mütemekkine iken bundan [akdem] hâlike olan Katerina bt. Kosta’nın sadrî sagīr oğlu Bakam’ın tesviye-i umûruna bir vasî nasbı lâzım ve mühim olmağın emânet ile ma‘rûf ve her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīr-i mezbûrun babası işbu râfiʻü’s-sifr Mihal v. Yorgi’yi hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûrun tesviye-i umûruna vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Rebîʻi’l-evvel sene semân ve hamsîn ve mi’e ve elf. Şuhûdü’l-hâl: Abdullah b. Abdurrahman, Said Çelebi b. Mustafa, Ömer Çelebi b. Ali, es-Seyyid Mehmed b. es-Seyyid Mustafa ve gayruhum. Papa Panayot v. Manol, Dırako v. Andon, Dimitraki v. Yanaki, Panayot v. Yorgi.