Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 171 Hüküm no: 124 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un terekesinden küçük çocukları Mehmed Sâdık ile Emine’ye nafaka tayini Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Takyecibaşı Mahallesiʼnde sâkine iken bundan akdem vefât eden Havvâ Hatun bt. Hasan’ın sadrî sagīr oğlu Mehmed Sâdık ile sadriye sagīre kızı Emine’nin tesviye-i emirlerine kıbel-i şer‘den bâ-hüccet-i şer‘iyye mansûb vasîleri olan işbu râfiʻü’l-kitâb İbrahim Ağa b. Hüseyin meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasîleri olduğum sagīrân-ı mezbûrânın nafaka ve kisveye eşedd-i ihtiyâçları olmağla anaları müteveffât-ı mezbûreden müntakil mâlından kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mütekarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīrân-ı mezbûrânın vâlideleri müteveffât-ı mezbûreden müntakil mâllarından herbirine beher yevm yirmişer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīrân-ı mezbûrânın nafaka ve kisve-bahâlarına harc u sarfa ve lede’l-iktizâ istidâneye ve inde’z-zafer mâllarından rücû‘a vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’r-râbiʻ ve’l-ışrîn min-Şaʻbâni’l-muʻazzam li-sene semân ve hamsîn ve mi’e ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, el-Hâc Mehmed b. Hasan, es-Seyyid Mehmed b. es-Seyyid Mustafa, Ahmed Ağa b. Hamdi Mehmed, es-Seyyid Ahmed b. es-Seyyid Mehmed, es-Seyyid Ömer ve gayruhum.