Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 353 Hüküm no: 293 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ahmed’in vefât eden el-Hâc Mustafa’daki alacağını terekesinden talebi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de vâki‘ Topçular’da sâkin işbu vâkiʻü’l-kitâb es-Seyyid Ahmed b. Mehmed meclis-i şer‘-i şerîf-i enverde medîne-i mezbûrede Câmi‘-i Kebîr Mahallesiʼnde sâkin iken bundan akdem vefât eden Karcıbaşızâde demekle ma‘rûf el-Hâc Mustafa b. Osman’ın evlâd-ı sıgārının tesviye-i emirlerine bâ-hüccet-i şer‘iyye vasiyy-i muhtârı olup tereke-i müteveffâ-i mezbûra bi’l-vesâye vaz‘-ı yed eden Mehmed Ağa b. İbrahim Efendi mahzarında üzerine da‘vâ ve takrîr-i kelâm edip müteveffâ-i mezbûr el-Hâc Mustafa b. Osman b. Abdullah hayâtında beher mâh onar guruş ücret ile karcılıkda beni istihdâm edip hatta müteveffâ-i mezbûr hâl-i hayâtında ve kemâl-i akl [u] sıhhatinde fevtinden üç sene mukaddem zimmetinde bana ücretden otuz guruş vâcibü’l-edâ deyn olduğunu huzûr-ı Müslimîn’de kirâren ve mirâren ikrâr ve işhâd edip kable’l-edâ fevt olmağla meblağ-ı mezbûru terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den medîne-i mezbûrede Fethi Çelebi Mahallesiʼnde sâkin İbrahim b. Halil ve es-Seyyid Veliyüddin b. Derviş nâm kimesneler li-ecli’ş-şehâde meclis-i şer‘a gelip hâzırân olup isre’l-istişhâd fi’l-hakīka müteveffâ-i mezbûr el-Hâc Mustafa b. Osman b. Abdullah hayâtında beher mâh onar guruş ücret ile karcılıkda işbu müdde‘î-i mezbûr es-Seyyid Ahmed’i istihdâm edip hatta müteveffâ-i mezbûr hâl-i hayâtında ve kemâl-i akl [u] sıhhatinde fevtinden üç sene mukaddem zimmetinde ücretden müdde‘î-i mezbûra otuz guruş vâcibü’l-edâ deyn olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm mâ-vaka‘a bi’t-taleb ketb olundu. Fî-gurreti min-Cemâziyelevvel sene tisʻa ve hamsîn ve mi’e ve elf, 1159. Şuhûdü’l-hâl: Es-Seyyid Mehmed b. es-Seyyid Mustafa, es-Seyyid Ahmed [b.] es-Seyyid Mehmed, Halil Çelebi b. İbrahim, Halil Efendi el-Mukayyid, Ahmed Ağa [b.] Mehmed Hamdi.