Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 361 Hüküm no: 302 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hac yolunda vefât eden Zaim el-Hâc İsmail Ağa’nın küçük kızına babasının terekesinden nafaka tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Takyecibaşı Mahallesi ahâlîsinden olup bu sene-i mübârekede tarîk-i hacc-ı şerîfde vefât eden Za‘îm el-Hâc İsmail Ağa b el-Hâc Mehmed’in sulbiye sagīre kızı Afife’nin vâlidesi ve tesviye-i umûruna kıbel-i şer‘den bâ-hüccet-i şer‘iyye mansûbe vasiyyesi olan işbu râfiʻatü’l-kitâb Âişe Hatun bt. Mustafa Efendi meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasîsi olduğum sagīre-i mezbûrenin nafaka ve kisveye eşedd-i ihtiyâcı olmağla babası müteveffâ-i mezbûrdan müntakil mâl-ı mevrûsundan kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyye-i mezbûrenin kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin mâl-ı mevrûsundan beher yevm kırk akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisvesine harc u sarfa ve lede’l-iktizâ istidâneye ve inde’z-zafer mâlına rücû‘a vasiyye-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Rebîʻülâhir sene tisʻa ve hamsîn ve mi’e ve elf, 1159. Şuhûdü’l-hâl: Eş-Şâhidûnü’s-sâbıkūn.