Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 329 Hüküm no: 521 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Dimitri’nin Haslar sâbık mültezimi Ali Usta’ya olan borcunu ödemesi Maʻrûz-ı dâʻî-i Devlet-i aliyyeleridir ki; Bakkāl tâifesinden Dimitri nâm zimmî meclis-i şerʻde taʻyîn olunan Mustafa Haseki mübâşeretiyle Eyüb mahkemesine ihzâr olunan işbu bâʻisü’l-iʻlâm Usta Ali Ağa muvâcehesinde mezbûr Ali Usta Hâslar mültezimi iken Mevlev[î]hâne Yenikapısı hâricinde tarafından hizmetine taʻyîn işbu Bostanî Ali kendinin emriyle müddet-i maʻlûmede benden ve şerîkimden meʼkûlât bahâsından cemʻan üç bin dört yüz yetmiş bir paranın emrine binâʼen mezbûr Ali Usta’dan baʻde’l-hesâb bi’d-defâʻat bin yedi yüz altmış para makbûzum olup bâkī bin yedi yüz otuz altı para hakkım kalmışdır taleb ederim deyü daʻvâ etdikde mezbûr Ali Usta emr-i mezkûru ikrâr lâkin hizmetkârı mezbûr Ali’nin iştirâ eylediği meʼkûlât bahâsından deyni meçhulüm iken kable’l-hesâb müddeʻî-i mesfûra bi’d-defâʻat kırk dört guruş vermiş idim meʼkûlât bahâsından deyn-i mürettebesi emrime binâʼen takās ve ziyâdesini bana reddolunmak murâdımdır deyü müddeʻî-i mesfûrun müddeʻâsını baʻde’l-inkâr hizmetkârı mezbûr Bostanî Ali istintak olundukda meʼkûlât bahâsından deynim ancak beş yüz kırk altı paradır deyü kezâlik müddeʻî-i mesfûrun ziyâde müddeʻâsını inkâr etmekle müddeʻî-i mesfûrdan ber-vech-i muharrer müddeʻâsına mübeyyine beyyine taleb olundukda ityân-ı beyyineden izhâr-ı acz ve talebiyle mezbûrândan her biri baʻde’t-tahlîf mûcebince mezbûr Ali Usta yedinden kable’l-hesâb kabzını muʻterif olduğu meblâğ-ı mezbûrdan mezbûr Bostanî Ali’nin ikrârıyla zimmetinde sâbit meʼkûlât bahâsından beş yüz kırk altı para deynine takās mâʻadâ bin iki yüz on dört parayı mezbûr Ali Usta’ya redd ü teslîme mesfûr Dimitri zimmîye tenbîh-birle beş yüz kırk altı parası deynine takās mâʻadâ bin iki yüz on dört parayı mezbûr Ali Usta’ya redd ü teslîme mesfûr Dimitri zimmîye tenbîh-birle tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâbiʻ aşer min-Cemâziyelevvel li-sene ihdâ ve sittin ve miʼe ve elf.