Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 357 Hüküm no: 582 Orijinal metin no: [57b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dürrî Mehmed Efendi Vakfı’na aid olan menzile kirâ ile ortaklaşa mutasarrıf olan el-Hâc Ahmed b. Mehmed ile Rukiye Hatun arasındaki ihtilâfın giderilmesi Maʻrûz; Bâ-fermân-ı âlî savb-ı şerʻden mürsel Kâtip Mehmed Efendi hâssa miʻmârlarından el-Hâc Süleyman b. Mustafa ve Ali b. Süleyman nâm halîfeler ile nezâretlerinde olan merkūm Dürrî Mehmed Efendi Vakfı’ndan Eyüb İskelesi kurbünde zikr-i âtî münâzaʻun-fîh olan vakıf menzilin üzerine varıp menzil-i mezbûrun nısfına icâreteyn ile mutasarrıfeler olan sâhibe-i arzuhâl Hâce Sâliha’nın zevci ve vekîl-i müseccel-i şerʻîsi olan el-Hâc Ahmed b. Mehmed vekâleten ve Şerife Hatice asâleten ve nısf-ı âhara kezâlik icâreteyn ile mutasarrıfe olan Rukiye nâm Hatun ile meclis-i maʻkūdda mütevellî-i vakf İsmail Efendi’nin vekîli câbî-i vakf İbrahim Çelebi hâzır olduğu hâlde terâfuʻlarında miʻmârân-ı mezbûrânın misâhaları üzere vakf-ı menzil-i mezbûrun binâlı ve binâsız mecmûʻ arsası tûlen on üç buçuk arzen yedi buçuk terbîʻî doksan dokuz zirâʻ olup iktisâmı vakfa muzır olmamağla reʼy-i mütevellî ile iktisâm olundukda mezbûre Hâce Sâliha ile mezbûre Şerife Hatice’nin iştirâken hisselerine kırk dokuz zirâʻ altı parmak ve mezbûre Rukiye hissesine kezâlik kırk dokuz zirâʻ altı parmak hisseleri müteʻayyen olup mezbûre Rukiye’nin bennâ zirâʻıyla mezbûretânın hisselerinden işbu müşâhede ebniye ve arsadan fuzûlî tecâvüz eylediği tûlen dokuz zirâʻ ve arzen altı parmak mahalde n mezbûre Rukiye kasr-ı yedine ve binâsını refʻ etmek üzere her biri reʼy-i mütevellî ile hisse-i müfrezlerini kabz ve kabûl ve birbirlerine katʻ-ı nizâʻ eylediklerini mevlânâ-yı mezbûr mahallinde baʻde’l-keşf ve’t-tahrîr ve maʻan baʻs olunan ümenâ-i şerʻle meclis-i şerʻa gelip alâ-vukūʻıhî baʻde’l-inhâ ve’t-tescîl huzûr-ı âlîlerine iʻlâm olundu. Fermân hazret-i veliyyü’l-emrindir. Fî 16 min-Recebi’l-ferd sene 1161