Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 383 Hüküm no: 637 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris es-Seyyid Mehmed Said Efendi’nin tasarrufunda bulunan suyun ölçümü yapılıp bir miktarının ifrâz olunduğu Maʻrûz-ı dâʻî-i Devlet-i aliyyeleridir ki; Sâdır olan fermân-ı âlîleri üzere savb-ı şerʻden mürsel Başkâtib Mehmed Efendi atabe-i aliyye-i husrevânede bi’l-fiʻil Su Nâzırı olan Halil Ağa ve evkāf-ı selâtîn-i sâlife ser-bölükleri ve sâir adamlarıyla sâhib-i arzuhâl müderrisîn-i kirâmdan es-Seyyid Mehmed Said Efendi’nin yedinde olan hüccet-i mübâyaʻa mûcebince mahmiye-i İstanbul’da Aynalıçeşme kurbünde mutasarrıf olduğu menziline kadîmden cereyân edip Havâss-ı aliyye kazâsında Ayvad havuzu kurbünde Ortadere nâm mevziʻde vâkiʻ Haydar Ağa suyu demekle maʻrûf ol mevziʻde ana lağımına bâ-izn-i mütevellî mülhak mâ-i mezbûr musluğu üzerine varılıp akd-i meclis-i şerʻ-i âlî olundukda mâ-i lezîz-i mezbûru bâ-fermân-ı âlî erbâb-ı miyâh alâ-vechi’l-muʻtâd beynlerinde vezn-i sahîh ile vezn ve tahmîn eylediklerinde tâm ve kâmil dört masura suyu cârî olduğu zâhir ve nümâyan olup kānun üzere üç çuvaldızı hakk-ı mecrâ içün ifrâz olundukdan sonra bâkī üç masura ve bir çuvaldız suları kaldığını bi’l-ittifâk haber verdikleri mevlânâ-yı mezbûr vâkiʻ hâli mahallinde baʻde’t-tahrîr maʻan mürsel ümenâ-i şerʻle gelip alâ-vukūʻıhî inhâ ve takrîr etdikleri huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Hurrira fi’l-yevmi’r-râbiʻ ve’l-ışrîn min-Şaʻbâni’l-muʻazzam li-sene ihdâ ve sittin ve miʼe ve elf.