Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 571 Hüküm no: 914 Orijinal metin no: [105a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşcı Mustafa Beşe’nin vefât eden el-Hâc Mahmud’a olan borcunu vârislerine ödediği Maʻrûz; Müteveffâ el-Hâc Mahmud’un sulbî kebîr oğulları el-Hâc Ahmed ve Süleyman nâm kimesneler derûn-ı arzuhâlde mastûrü’l-ism olan Kapadan nâm karyeden Taşcızâde Mustafa Beşe mahzarında mezbûr Mustafa Beşe ile babamız müteveffâ-i mezbûrun çiftcilik husûsunda müddet-i şirketlerinde beynlerinde cereyân eden hesapları üzere baʻde’l-münâzaʻa yüz guruşa beynlerin sulh ve meblâğ-ı sulh-i mezbûru kable’l-ahz fevt olup bâ-temessük karzdan tahrîr ve mevrûs meblâğ-ı mezbûr yüz guruşu mezbûr Mustafa Beşe’den taleb ederiz deyü baʻde’d-daʻvâ ve meblâğ-ı mezbûrdan elli guruşu ikrârıyla ve elli guruşu şuhûd-ı udûlle vech-i şerʻî üzere baʻde’s-sübût edâsıyla mezbûr Mustafa Beşe ilzâm olundukdan sonra meblâğ-ı mahkûmün-bih merkūm yüz guruşun doksan dört buçuk guruşunu huzûr-ı şerʻde mübâşiri Muhzır Ali yediyle edâ ve teslîm onlar dahi bi-kadri’l-hısas ahz u kabz edip bâkī beş buçuk guruş mütâlebesinden mezbûr Mustafa Beşe’nin zimmetini ibrâ ve iskāt eyledikleri Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 20 min-Şaʻbâni’l-muʻazzam sene 1162