Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 580 Hüküm no: 930 Orijinal metin no: [106b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zaim İsa Ağa’nın hizmetini gören Abdullah Ağa’nın hizmetinin karşılığı olan parayı aldığının tespit olunduğu Maʻrûz-ı dâʻî-i Devlet-i aliyyeleridir ki; Medîne-i Ebâ Eyüb el-Ensârî’de sâkin Abdullah Ağa nâm kimesne Güzelhisar kazâsında Hurşid nâm zeʻâmetin mutasarrıfı olan işbu bâʻisü’l-iʻlâm Zaʻîm İsa Ağa nâm kimesne ile terâfuʻ etdiklerinde mezbûr İsa Ağa’nın yüz altmış bir senesinde zeʻâmet-i mezkûreyi zabt u rabt [ve] vâkiʻ olan âʻşâr-ı şerʻiyye ve bi’l-cümle hâsılâtını ahz u kabz ve bana îsâl eyle sana beş yüz guruş ücret vereyim demekle beni tevkîl ben dahi kabûl ve sene-i mezbûrede zeʻâmeti üç aded hizmetkârım ile zabt, makbûzum mertebesi bin yedi yüz elli guruş bi’d-defâʻat kendine teslîm edip zamân-ı zabtımda malımdan üç yüz guruş dahi mezbûrun maslahatına bi-şartü’r-rücûʻ sarf etmekle meblâğ-ı masrûf-ı mezbûr üç yüz guruş ile ücret-i merkūme beş yüz guruşu taleb ederim deyü daʻvâ etdikde mezbûr İsa Ağa dahi müddeʻî-i mezbûr Abdullah Ağa’ya sana riʻâyet ederim deyü zeʻâmetini tarafımdan zabt, baʻde’t-tevkîl ol dahi üç nefer hizmetkârı ile bir sene zeʻâmeti zabt ve meblâğ-ı mezbûr bin yedi yüz elli guruş kabzını ikrâr edip lâkin tarafımdan âhar vekîlim olan gāib ani’l-meclis es-Seyyid el-Hâc Mehmed Ağa müddeʻî-i mezbûr Abdullah Ağa ile baʻde tamami’l-hizme hesâbı gördüklerinde baʻde ihrâci’l-mesârif müddeʻî-i mezbûr Abdullah Ağa zimmetinde zuhûr eden iki yüz elli guruş baʻde’l-edâ zeʻâmet-i mezkûreyi müddet-i zabtda ücret-i masrûfa müteʻallika bir akçe ve bir habbe hakkım yokdur deyip işbu yedimde olan temessük mûcebince zimmetimi berî etmişdir deyü defʻ etdikde müddeʻî-i mezbûr Abdullah Ağa vekil-i mezbûr es-Seyyid el-Hâc Mehmed Ağa mütegallibeden [ve] tehdî[di]ni îkāʻa kādir olmağla ibrâm ve tahrîr-i temessük-ı ikrâh ile olmuşdur deyü baʻde’d-defʻ ve’l-inkâr müddeʻî-i mezbûr Abdullah Ağa ikrâh daʻvâsını isbât edemeyip ve mezbûr İsa Ağa baʻde’t-tahlîfü’ş-şerʻî mûcebiyle bilâ-beyyine bî-vech muʻârazadan müddeʻî-i mezbûr Abdullah Ağa menʻ olunup Eyüb mahkemesinde tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-hâmis ve’l-ışrîn min-Cemâziyelâhir sene isneyn ve [sittin] ve miʼe ve elf. Kad vakaʻa’l-ferağ mine’l-kaydi’l-iʻlâm fi’l-makāmi bi-avnillâhi’l-Meliki’l-allâm ve’s-salâtü alâ-nebiyyihi’l-kerîm aleyhi’s-selâm. Fi’l-yevmi’s-sâlis min-Recebi’l-ferd li-sene 1162 Mühür