Galata Mahkemesi 5 Numaralı Sicil (H. 983 - 984 / M. 1575 - 1576) cilt: 32, sayfa: 119 Hüküm no: 162 Orijinal metin no: [109-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîrî b. Abdürrahim’in beytülmâlce kabz edilen muhallefâtının mirasçılarına iadesi Mustafa b. Halil ve Hasan b. Ramazan, Dîvân-ı âlî’de, lede’d-defter emâcid-i ekârim arasında mahmiye-i Kostantıniyye’de vâki‘ beytülmâl-i hâs emîni fahrü’l-akrân Mehmed Çelebi b. Hüsam Bey ve kâtibi Ali Bey b. Abdullah mahzarlarında, Ahmed b. Pîrî’den sâdır olan da‘vâ-yı sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, müdde‘î-i mezbûr, Buhurcu Pîrî deyû meşhûr olan ve mahmiye-i mezbûre mahallâtından Saka Bâli mahallesinde fevt olup muhallefâtı mahmiye-i mezbûrede vâki‘ beytülmâl-i hâs emîn-i sâbıkı Bâli Bey b. Abdullah eliyle kabz edilen Pîrî b. Abdürrahim’in sulbî oğludur. Muhallefâtından 983 senesi Rebî‘ulâhirinin yirmi birinci günü râyicü’l-vakt altı bin akçesi mezbûr Bâli Bey eliyle Hazîne-i âmire’ye vâsıl olmuşdur. Müteveffânın verâseti ona ve Kamer bt. Pîrî adlı sulbiye kızına münhasırdır. Muhallefâtının da o ikisine teslîmi lâzımdır. Mezbûre Kamer, muhallefâtı mezbûredeki hisse-i şer‘iyyesinin talebi, kabzı ve kendisine îsâli husûsunda müdde‘î-i mezbûru vekîl etmiş o da vekâlet-i mesfûreyi kabûl etmişdir. Şehâdetleri ba‘de şerâiti’l-kabûl inde’ş-şer‘ mu‘teber ve makbûl olmağın mûcebince hükm edildi. Cerâ zâlike ve hurrire fi’l-yevmi’r-râbi‘ ve’l-ışrîn min şehri Ramazâni’l-mübârek sene selâse ve semânîn ve tis‘a mi’e. Şuhûdü’l-hâl: Fahrü’l-akrân Bâli Çavuş b. Ali, Ahmed b. Yusuf, İlyas b. Abdullah