Galata Mahkemesi 5 Numaralı Sicil (H. 983 - 984 / M. 1575 - 1576) cilt: 32, sayfa: 127 Hüküm no: 176 Orijinal metin no: [117-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Allahverdi b. Mehmed’in muhallefâtının vârislerine teslimi Lütfi b. Mehmed ve Mustafa b. Mehmed, Dîvân-ı âlî’de, lede’d-defter emâcid-i ekârim arasında mahmiye-i Kostantıniyye’de vâki‘ beytülmâl-i hâs emîni fahrü’l-akrân Mehmed Çelebi b. merhûm Hüsam Bey ve kâtibi Ali Bey b. Abdullah mahzarında, Allahverdi nâm kimesnenin Emine, Mehmed ve Ahmed nâm sıgārına kıbel-i şer‘den mansûb vasî olan Receb b. Mehmed cânibinden hasm-ı şer‘i mahzarında ale’l-vechi’l âtî da‘vâ, isbât, kabz ve îsâle vekîl edilen Kubad b. Mehmed’den vekâleten sâdır olan da‘vâ-yı sahîhada gıbbe’l-istişhâdi’ş-şer‘î şöyle şehâdet ettiler ki, sıgār-ı mezbûrîn, beytülmâl-i merkūmun emîn-i sâbıkı olan Ahmed Çavuş b. Kasım yediyle muhallefâtı zabt edilen ve mahmiye-i mezbûrede maslûben fevt olan Allahverdi b. Mehmed’in sulbî çocuklarıdır. Allahverdi b. Mehmed’in zabt edilmiş muhallefâtından 983 senesi gurre-i Rebî‘ulâhirinde Hazîne-i âmire’ye vâsıl olan mikdâr râyicü’l-vakt bin üç yüz seksen beş akçe olup, verâseti sıgār-ı mezbûrîne münhasırdır. Allahverdi b. Mehmed’in muhallefâtının onlara teslîmi lâzımdır. Zamânın kazâ-i Van kadısı mevlânâ Yahya b. Cemaleddin’den verilen hüccetin vârid olmasından ve hüccet-i mezbûrenin kadı-ı merkūmun hücceti olduğunun mezbûr emîn Mehmed Çelebi mahzarında, isimleri zeyl-i kitâbda muharrer udûlden Polat Bey b. Ali ve Ahmed b. Tanrıvermiş şehâdetleri ile sâbit olmasından sonra şehâdetleri ba‘de şerâiti’l-kabûl inde’ş-şer‘ mu‘teber ve makbûl olmağın mûcebince hükm edildi. Cerâ zâlike ve hurrire fi’l-yevmi’l-âşir min Şevvâli’l-mükerrem sene selâse ve semânîn ve tis‘a mi’e. Şuhûdü’l-hâl: Zeynel b. Şemseddin, Ahmed b. Mehmed