Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 94 Hüküm no: 95 Orijinal metin no: [22b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüsrev Bey’in köle satımından doğan alacağını tahsil ettiği Fahrü’l-cüyûş Rıdvan Çavuş b. Abdullah ve Cafer b. Abdullah’ın tezkiyyeleri ile tezkiyye edilmiş bulunan el-Hâc Mustafa b. Abdullah el-Müezzin ve Veli b. Bâli nâm kimesneler meclis-i şer‘-i şerîfe hâzırân olup, bundan akdem Tophâne’de fevt olan reis-i sultânî merhûm Murad b. Abdullah’ın muhallefâtına vâzı‘ü’l-yed olan fahrü’l-ümenâ Musa Bey b. Kaya nâm emîn ve kâtibi Ali Bey b. Abdullah mahzarında, Hüsrev Bey b. ( ) kıbelinden da‘vâ ve isbâta vekâleti Ali b. Abdullah ve el-Hâc Piyâle b. Abdullah’ın şehâdetleri ile sâbit olan fahrü’l-akrân Perviz Bey b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müvekkil-i mezbûrun müteveffâ-yı merkūmun zimmetinde gulâm semeninden râyicü’l-vakt on iki bin akçe hakkı vardır. Bizim yanımızda ve katımızda böyle ikrâr etmişdi. Şehâdetleri ba‘de ri‘âyeti şerâiti’l-kabûl ve ba‘de’t-ta‘dîl ve’t-tezkiyye inde’ş-şer‘ makbûl ve mû‘teber olmağın mûcebince on iki bin akçenin edâsına hükm edildi. Sonra vekîl-i mezbûr meclis-i şer‘a hâzır olup meblağ-ı merkūmu emîn-i mersûm yedinden tâm ve kâmilen ahz ü kabz ettiğini ikrâr etti. Bu sûretle müvekkil-i mezkûrun müteveffâ-yı mesfûrda bir akçe ve bir habbe hakkı kalmadı. Vâki‘ ikrâr emîn-i mezkûr tarafından vicâhen ve şifâhen tasdîk edildi. Cerâ zâlike fî evâili Rebî‘ilevvel sene 998. Şuhûdü’l-hâl: Mustafa b. Abdülkerim, Hüsrev b. Abdullah, Mustafa b. Ali, Mahmud b. İslâm, el-Hâc Hasan el-Kayyım ve gayruhüm.