Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 104 Hüküm no: 110 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ümmî Hâtun bt. Sinan Bey’in yetimlerine kalan mal ve evden, kocası Memi Reis’e olan borcu için vasî tarafından evinin satılıp borcun ödendiği Mahmiye-i Galata’da el-Hâc A‘mâ mahallesinde vefât eden Ümmî Hâtun bt. Sinan Bey veresesiyle zevci Memi Reis nâm kimesne mahfil-i kazâda mezbûrenin sıgārına vasî olup ceddeleri olan Fahri Hâtun bt. Musa mahzarında takrîr-i kelâm edip zevcem müteveffât-ı mezbûre Ümmî Hâtun’dan iki yüz yirmi altı bin altmış iki akçe mal kalıp meblağ-ı mezbûrdan hakkım elli altı bin beş yüz kırk akçe olup şer‘le taleb eylediğimde vasiyy-i mezbûre merkūmenin metrûkâtından Emekyemez mahallesinde inde’l-ahâlî ve’l-cîrân ma‘lûmü’l-hudûd olan dârını altmış bin akçeye bana verip elli altı bin beş yüz kırk akçesin rub‘ hisse-i şer‘iyyem için kabûl edip bâkī üç bin dört yüz altmış akçesin vasiyy-i mezbûreye teslîme müte‘ahhid oldum ve müteveffât-ı mezbûreden intikāl eden dâr-ı müşterekin ve esbâb ve emti‘anın sıgāra ve mezbûreye kalmak münâsib olmağın onlarda hisse-i şer‘iyyem kalmışdır tahmîn-i sahîh ile bahâ takdîr olunup cümlesi meblağ-ı mezbûrda karâr ettikden sonra cemî‘ mâldan hisse-i â‘ideme tuta menzil-i mezbûru vech-i meşrûh üzre kabûl ettim min ba‘d sâir muhallefâtda hakkım kalmayıp ve mîrâs husûsunda nizâ‘ım kalmamışdır dedikde vasiyy-i mezbûre dahi tasdîk ettikden sonra kaziyye bi’t-taleb kayd-ı sicil olunup bu vesîka yed-i tâlibe def‘ olundu ki müzekkir-i mâ cerâ ola. Tahrîren fî evâili şehri Rebî‘ilâhir sene 998. Şuhûdü’l-hâl: Hürrem Reis b. Abdullah er-Reis ü’s-sultânî, el-Hâc Memi b. Abdullah, Ahmed Hoca b. Abdullah, Sefer Çelebi b. Pervâne er-Reis ü’s-sultânî.