Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 138 Hüküm no: 143 Orijinal metin no: [18b-5, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hatun’un, kocası Abdi Çelebi’de ödünçten alacağı olduğu << Mehmed b. Cafer el-Müezzin ve Abdurrahman b. Mehmed nâm kimesneler meclis-i şer‘a hâzırân olup mahmiye-i Galata müzâfâtından Kasımpaşa mahallâtından Sirkeci mahallesinde bundan akdem fevt olan merhûm Abdi Çelebi b. Mehmed’in eytâm-ı sıgārına kıbel-i şer‘den mansûb vasî olan Abdülganî b. Abdi nâm hasm-ı câhid mahzarında, müteveffâ-yı mezbûrun zevcesi hâmiletü hâze’l-kitâb Rahime Hâtun bt. Hasan’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr hâl-i hayâtı ve kemâl-i sıhhatinde, müdde‘iye-i mezbûre lehine karz-ı şer‘î cihetinden zimmetinde lâzımü’l-edâ ve vâcibü’l-kazâ râyicü’l-vakt altı bin akçe deyni olduğunu bizim yanımızda ve katımızda ikrâr etti. Müdde‘iye-i mezbûreye meblağ-ı merkūmu bi vechin mine’l-vücûh ve sebebin mine’l-esbâb kısmen veya tamâmen ahz ü kabz etmediğine dâir yemîn billâhi te‘âlâ verildikden ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra mûcebince meblağ-ı merkūmun müteveffâ-yı mesfûrun muhallefâtından edâsına hükm edildi. Cerâ zâlike ve hurrire fi’l-yevmi’s-sâlis ve’l-ışrîn min şehri Şevvâli’l-mükerrem sene hamse ve elf. Şuhûd: Mevlânâ Ali Çelebi b. el-Hâc Yusuf, Abdülkerim b. Mehmed, Hüsrev b. Abdullah, mevlânâ Mehmed Efendi b. Nurullah ve Habib b. Nuh el-Kâtib, Ahmed b. Hüseyin ve gayruhüm >>