|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 262 Hüküm no: 324 Orijinal metin no: [48a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ali Çelebi’nin Ahmed Çavuş’un vasiyy-i muhtârı olduğu
El-emru kemâ rukime fihî hüve el-fakīr Abdülbâkī el-Kadı bi asâkiri Rumeli. Hüccet-i mezbûreyi Kazasker Efendi kendileri istimâ‘ edip bunda kayd olundu. Kasımpaşa mahallâtından Yeldeğirmeni mahallesi sükkânından udûlden Mehmed Halîfe b. Ali el-İmâm ve Nasuh Dede b. Abdünnebi ve Hüseyin b. Süleyman ve Abdülkerim b. Ali ve Mehmed Bey b. Abdullah er-Râcil nâm kimesneler meclis-i şer‘-i şerîf ve mahfil-i dîn-i münîfe hâzırûn olup, hâl-i hayâtında mahalle-i mezbûrede sâkin iken bundan akdem mahrûse-i Üsküdar’da vâki‘ merhûme Vâlide Sultan hanında vefât eden kāid-i sultânî merhûm Ahmed Çavuş b. Mustafa’nın muhallefâtına vâzı‘-ı yed olan, Havâss-ı mahmiye-i Kostantıniyye ve Galata’da vâki‘ beytülmâl-i hâs emîni Mehmed Çavuş b. Abdullah mahzarında, merhûm-ı mezbûrun ammizâdesi olan, Dîvân-ı âlî kâtiblerinden hâmil-i hâze’l-kitâb Ali Çelebi b. Nasuh’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezkûr Ahmed Çavuş, techîz ve tekfînine ve sâir levâzımına, vasiyyetlerinin tenfîzine, zimem-i nâsdaki haklarının kabzına, nehc-i şer‘î üzre sâbit olan borçlarının edâsına, evân-ı rüşd ve zamân-ı bülûğlarına kadar Mehmed ve Mustafa nâm sagīreyninin emvâlinin hıfzına ve müteveffâ-yı mastûr babalarından irs-i şer‘le kendilerine intikāl edecek emlâkin zabtına müdde‘î-i mezbûru vasiyy-i muhtâr seçdi. Mezbûr Ali Çelebi vesâyet-i merkūmeyi kabûl edip hizmet-i lâzımesini edâyı müte‘ahhid oldu. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın hâkim-i muvakki‘-i a‘lâhu şehâdetleri mûcebince müdde‘î-i mezbûrun vesâyetine hükm etti. Cerâ zâlike ve hurrire fî evâili şehri Ramazâni’l-mübârek sene sitte ve elf. Şuhûd: Halil Bey b. el-Bevvâbü’s-sultânî, Mustafa Bey b. Ramazan, Abdülkerim b. Mehmed, Güvendik Reis b. Sevindik, Receb Reis b. Çelebi, el-Hâc Mehmed b. ( )
|