.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 268
Hüküm no: 333
Orijinal metin no: [49a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mahmud Halife’nin bağının borçları için satıldığı

Mahmiye-i Galata hâricinde vâki‘ Muhyiddin Efendi mahallesi sâkinlerinden olup bundan akdem vefât eden merhûm Mahmud Halîfe b. Şehsüvar nâm müteveffânın sulbî oğulları Osman ve Ali ve sulbiye kızları Âişe ve Rahime nâm sagīrlerine vasiyy-i muhtâr olan el-Hâc Mahmud Halîfe b. Muharrem vesâyeten ve müteveffâ-yı mezkûrun kebîr oğlu Mustafa asâleten ve mezbûrun zevce-i metrûkesi olan Mihman bt. Sefer nâm hâtun dahi asâleten meclis-i şer‘-i şerîf-i lâzımü’t-tevkīrde işbu sâhibü’l-kitâb İbrahim b. Hüsrev nâm kimesne muvâcehesinde takrîr-i kelâm ve ta‘bîr ani’l-merâm edip müteveffâ-yı merkūmun cümle muhallefâtından Hadım Pınarı nâm mevzi‘de bir cânibi Emir Efendi bağı ve bir cânibi Osman Bey b. ( ) bağı ve bir cânibi Ligoraki zimmî bağı ve bir cânibi tarîk-i âm ile mahdûd olan on dönüm mikdârı bağı sûk-ı sultânîde zarûret-i deyn için bey‘ men yezîd tarîkiyle mezâd olunup rağabât-ı nâs münkatı‘a oldukdan sonra mezbûr İbrahim üzerinde bin beş yüz akçede karâr eylemeğin meblağ-ı merkūm bin beş yüz akçeyi mersûm İbrahim’den bi’t-tamâm ve’l-kemâl asâlet ve vesâyetimiz hasebiyle alıp kabz edip ba‘de’l-yevm bahçe-i mastûr mezbûr İbrahim’in mülk-i müşterâsı olup keyfe mâ yeşâ’ ve yahtâr mutasarrıf ola dediklerinde mukırrûn-ı mezkûrûnun vech-i meşrûh üzre olan kelimâtını merkūm İbrahim bi’l-muvâcehe tasdîk ve bi’l-müşâfehe tahkīk ettikden sonra mâ vaka‘a alâ vukū‘ihî ketb olunup yed-i tâlibe vaz‘ olundu. Tahrîren fi’t-târihi’l-mezbûr. Şuhûd: Mehmed Bey b. Abdullah, el-Hâc Hasan b. Ali, Mehmed b. Süleyman, Kurd b. Murad, Yahya b. Abdullah, Ahmed b. Mehmed