.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 282
Hüküm no: 359
Orijinal metin no: [52a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mudârebeden kaynaklanan borcun ödendiği

Mahmiye-i Galata’da vâki‘ kassâm-ı askerî mahzarında Aydın b. Yusuf ve Mustafa b. Ali nâm kimesneler meclisi şer‘-i şerîfi lâzımü’t-tevkīrde mahmiye-i mezbûre hâricinde vâki‘ Mustafa Ağa mahallesi sâkinlerinden olup bundan akdem vefât eden merhûm Mahmud Reis b. Şaban nâm müteveffânın sulbiye kızı [Emine] nâm sagīreye kıbel-i şer‘den vasî nasb olunan el-Hâc Ahmed b. Şaban nâm kimesne muvâcehesinde takrîr-i kelâm ve ta‘bîr ani’l-merâm edip müteveffâ-yı mezkûr zimmetinde alâ tarîki’l-mudârebe Mehmed b. Ahmed nâm kimesnenin dört bin akçe hakkı olup vasiyy-i mezbûrdan da‘vâ eyledikde vasiyy-i merkūm bi’l-külliyye inkâr edip müdde‘î-i mersûm Mehmed’den beyyine taleb olundukda udûl-i müslimînden Muslihiddin b. Abdullah ve Yusuf b. Musa nâm kimesneler meclis-i şer‘de müteveffâ-yı mesfûr zimmetinde müdde‘î-i mezkûr Mehmed’in dört bin akçe alâ tarîki’l-mudârebe hakkı olduğuna şehâdet-i şer‘iyye ettiklerinden sonra meblağ-ı merkūmun tahsîli için kıbel-i şer‘den ikimiz havâle ta‘yîn olunmuştuk el-hâletü hâzihî havâlesi olduğum meblağ-ı merkūm dört bin akçeyi vasiyy-i mersûm el-Hâc Ahmed yedinden bi’t-tamâm ve’l-kemâl alıp kabz edip meblağ-ı merkūmun sâhibi mersûm Mehmed’e teslîm eyledik dediklerinde mukırrân-ı merkūmânın vech-i meşrûh üzre olan kelimâtını mukarrun lehü’l-mesfûr el-Hâc Ahmed vicâhen tasdîk ve şifâhen tahkīk ettikden sonra mâ vaka‘a bi’t-taleb? ketb olunup yed-i tâlibe vaz‘ olundu. Tahrîren fî evâili şehri Ramazâni’l-mübârek sene sitte ve elf. Şuhûd: El-Hâc Piyâle b. Abdullah, el-Hâc Ramazan ...?, Mustafa Çelebi b. Ramazan, Muslihiddin b. Abdullah, Hüsrev b. Abdullah el-Muhzır ve gayruhüm