|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 284 Hüküm no: 361 Orijinal metin no: [52a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Bosna asıllı Mihal v. İzladi adlı kölenin serbest bırakıldığı
Tersâne-i âmire’de istihdâm olunan esîrlerden işbu hâmil-i hâze’l-kitâb orta boylu gendüm-gûn açık kaşlı elâ gözlü Bosneviyyü’l-asl Mihal v. İzladi nâm esîr meclis-i şer‘-i şerîfe hâzır olup takrîr-i kelâm ve ta‘bîr ani’l-merâm edip kadîmü’l-eyyâmdan esîr olup ve tersâne-i âmire’de bu âna gelince istikāmetle hizmet edip gereği gibi emekdâr ve pür-amel-mânde olup bir vechile kābil-i hizmet olmayıp mahall-i merhamet olmağın vezîr-i ekrem müşîr-i müfahham Halil Paşa hazretleri kapudânlık hizmeti ile memûr iken sene selâse ve elf Şa‘bânı’ndan üç yıl tamâmına dek hizmet edip ondan sonra yedine ıtâknâme verile deyû elime kendilerin mühr-i şerîfleri ile mahtûm bir tezkire-i şerîfe vermiş idi el-hâletü hâzihî üç yıl tamâm olup elimde olan tezkire mûcebince kıbel-i şer‘den ıtâknâme taleb ederin deyû kavlini musaddık vezîr-i müşârün-ileyhin hatemi ile mahtûm ve sene selâse ve elf Şa‘bân-ı gurresiyle müverraha bir tezkire ibrâz edip ber mûcib-i tezkire bu vesîka ber sebîl-i ıtâknâme ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâili şehri Şevvâli’l-mükerrem sene sitte ve elf. Şuhûd: Hüsam Reis b. Abdullah, Mahmud Reis b. Abdullah, Mehmed Reis b. ( ), Kurd Reis b. ( ), Haydar Reis b. Ahmed, Mehmed b. Yusuf, Hüsrev b. Abdullah, Mustafa b. Ali
|