|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 285 Hüküm no: 363 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mükâtebe bedeli üzerinde sulh olunduğu
Kasaba-i Kasımpaşa mahallâtından Yahya Kethüdâ mahallesi sâkinelerinden Sâliha bt. Mustafa nâm hâtun tarafından husûs-ı âti’z-zikri ikrâra Hasan Halîfe b. Ahmed el-İmâm ve Ali b. İbrahim ve Mustafa b. Nurullah el-Müezzin nâm kimesneler şehâdetleriyle şer‘an vekâleti sâbite olan Ahmed Halîfe b. Mehmed nâm kimesne meclis-i şer‘-i şerîf-i lâzımü’t-tevkīrde işbu hâmiletü hâze’l-kitâb orta boylu açık kaşlı ak benizli Rusiyyetü’l-asl Yasemin bt. Abdullah muvâcehesinde takrîr-i kelâm ve ta‘bîr ani’l-merâm edip bundan akdem müvekkilem mezbûre Sâliha sene erba‘a ve elf Cumâdelûlâ gurresinden câriye-i memlûkesi olan mezkûre Yasemin’i beş bin akçe kitâbete kesip câriye-i mersûme dahi kitâbet-i merkūmeyi kabûl ve mûcebince kıyâmı mültezime olup lâkin meblağ-ı mesfûr beş bin akçeyi edâ etmede aczi olmağın beynlerinde münâza‘a vâki‘ olmuş idi el-hâletü hâzihî mâbeyne muslihûn tavassut edip es-sulhu seyyidü’l-ahkâm fehvâsıyla âmil olup üç bin akçeye müvekkilem merkūme Sâliha’yı sulh edip bedel-i sulh olan meblağ-ı mezkûr üç bin akçeyi müvekkilem mezbûre Sâliha alıp kabz eyledim ba‘de’l-yevm câriye-i mastûre sâir harâir-i asliyyât gibi hürre olup uhdesinde utekā üzerinde mevâlî için olan hakk-ı velâdan gayrı hakkım kalmadı deyû ikrâr ve i‘tirâf eyledi dedikde vekîl-i mezbûrun vech-i meşrûh üzre olan ikrârını mukarrun lehe’l-mesfûre vicâhen tasdîk ve şifâhen tahkīk edip mâ vaka‘a alâ vukū‘ihî ketb ve tahrîr olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâili şehri Şevvâli’l-mükerrem li sene sitte ve elf. Şuhûd: eş-Şeyh Ahmed b. İlyas, Pervâne Bey b. Abdullah el-Bevvâbü’s-sultânî, Hasan Reis b. Yusuf, Receb b. Abdullah, el-Hâc Rıdvan el-Bevvâbü’s-sultânî, Mehmed b. Mustafa, Hüsrev b. Abdullah el-Muhzır
|