Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 306 Hüküm no: 394 Orijinal metin no: [57a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Öldürülen Cebeci Hasan Reis’in gemisinin satıldığı Medîne-i Galata müzâfâtından kasaba-i Beşiktaş’da merhûm Sinan Paşa mahallesi sükkânından olup kendi sefînesinde katl eyledikleri cebeci Hasan Reis b. Abdullah’ın hâlen Selânik’te sâkine olan sagīre kızı Belkıs’ın tesviye-i umûruna kıbel-i şer‘den vasiyy-i mansûbu olan Bâli Çavuş b. Hüseyin ve maktûl-i merkūmun diğer sagīre kızı Fâtıma’nın tesviye-i umûruna kıbel-i şer‘den vasiyy-i mansûbesi olup maktûl-i mezbûrun zevcesi Canfeda Hâtun bt. Abdullah mahfil-i kazâda cezîre-i Girid sükkânından olup işbu sufûf-ı sıhhat-zurûfun hâfızı olan Manol v. Sivasto nâm zimmî muvâcehesinde takrîr-i merâm ve bast-ı kelâm edip vasîsi olduğumuz sagīrelerin babaları merkūm Hasan Reis mahmiye-i Selânik’e giderken Limuye adasına karîb yerde sefînesi içinde olan yoldaşları katl ettikden sonra zikr olunan sefîneyi kātiller alıp giderler iken cezîre-i mezbûreye düşüp girift olunmağla bu cânibe gelmesi emr-i ba‘îd olup bey‘ olunma sagīre-i mezbûrelere enfa‘ idiğine Memi Reis b. Abdullah ve Rıdvan Bey b. Abdullah el-Cündî ve Ahmed Reis b. Abdullah ve Hüseyin Bey b. Abdullah ve sâir ahâlî-i mahalle mahfil-i kazâya gelip fi’l-vâki‘ maktûl-i mezbûr cebeci Hasan Reis’in sefînesi cezîre-i mezbûreye düşüp girift olunmağla bu cânibden taleb bulunur ise bey‘ olunması sagīre-i mezbûrelere vücûh-i şettâ ile enfa‘ ve evlâdır deyû alâ tarîki’ş-şehâde haber verdiklerinden sonra sefîne-i mezbûre emel-i medîd an yed-i ba‘îd bey‘ men yezîd olunup mezbûr Manol’ün üzerinde otuz beş bin akçede karâr edip rağabât-ı nâs münkatı‘a oldukdan sonra meblağ-ı mezbûra vesâyet-i mahkiyemiz hasebiyle zikr olunan sefîneyi içinde olan âlât ve esbâbı ile bey‘ edip meblağ-ı merkūmu mezbûr Manol yedinden bi’t-tamâm ve’l-kemâl alıp kabz ve tesellüm eyledik deyû ikrâr ve i‘tirâf ettiklerinde gıbbe’t-tasdîk vasiyy-i merkūm Bâli Çavuş ve Ahmed Reis b. Abdullah nâm kimesneler mahfil-i kazâya hâzırân olup zikr olunan sefînenin derkine emr ve kabûlü hâvî kefâlet ile kefîl olduklarında ol ki vâki‘ hâldir ketb olunup verildi ki vakt-i hâcetde ihticâc edine. Tahrîren fî evâili şehri Zilka‘deti’ş-şerîfe sene sitte ve elf. Şuhûd: Mehmed Reis b. Abdullah, Cafer Bey b. Abdullah el-Cündî, Mustafa Çelebi b. Hasan el-Bevvâbü’s-sultânî, Ali Çelebi b. Abdülkādir el-Bevvâbü’s-sultânî, Süleyman b. İbrahim, Mehmed b. Abdullah ve gayruhüm mine’l-hâzırîn