Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 349 Hüküm no: 453 Orijinal metin no: [67b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bileziğin Âmine bt. Resul’e ait olduğu Oldur ki Bundan akdem dâhil-i Galata’da Bereketzâde mahallesinde fevt olan merhûm Hüseyin b. Abdullah nâm cündînin zevcesi ve menkûhası Âmine bt. Resul nâm hâtunun da‘vâ-yı âti’l-beyâna bimâ hüve tarîkü’s-sübût vekîl-i şer‘îsi olan Abdülkādir b. Hacı merkūm Hüseyin Bey’in muhallefâtına vâzı‘ü’l-yed olan fahrü’l-akrân hâlen beytülmâl emîni Mehmed Çavuş b. Abdülmennân muvâcehesinde takrîr-i kelâm edip müvekkilem mezbûre Âmine Hâtun’un yirmi altı miskāl bir altın cebe? bileziğini zevci müteveffâ-yı mezbûr Hüseyin Bey hâl-i hayâtında ve kemâl-i sıhhatinde Hacı Piyâle nâm kimesneden kırk sikke-i altın istikrâz edip kendinin bir gümüşlü kılıncı ve bir gümüşlü hançer ile ma‘an Rehin vaz‘ eylemiş imiş, hâlen mezkûr Mehmed Çavuş emâneti hasebiyle mezkûr Hacı Piyâle’den alıp zikr olunan esbâbı fekk-i Rehin eylemiş, hâlen vekâletim hasebiyle taleb ederin deyicek gıbbe’s-suâl mesfûr Mehmed Çavuş zikr olunan bilezik benim makbûzumdur lâkin hâtun-ı mesfûr Âmine’nin hâlis mâlı olduğu ma‘lûmum değildir deyû inkâr ile cevâb vericek müdde‘î-i mezbûrun makāline mutâbık beyyine taleb olundukda udûl-i müslimînden Ahmed b. Mehmed ve el-Hâc Piyâle nâm kimesneler li ecli’ş-şehâde hâzırân olup ve edâ-i şehadet-i şer‘iyye edip fi’l-hakīka zikr olunan bilezik mezbûre Âmine’nin hâlis mâlıdır müteveffâ-yı mezbûr Hüseyin Bey hâl-i hayâtında ve kemâl-i sıhhatinde zikr olunan bileziği ben hâtunumdan alıp sâlifü’z-zikr kılıç ve hançer ile ma‘an üslûb-ı muharrer üzre rehin vaz‘ eylemiş deyû bizim huzûrumuzda dahi i‘tirâf eylemişdir bu husûsa şâhidiz şehâdet dahi ederiz dediklerinde ba‘de’t-ta‘dîli’ş-şer‘î şehâdetleri hayyiz-i kabûlde vâki‘ olmağın vâki‘ hâl kayd olundu. Tahrîren fî evâsıtı Zilhicce sene sitte ve elf. Şuhûd: Keyvan b. Abdullah, Hüseyin Çavuş Beşiktaşî, Cafer bey b. Abdullah, el-Hâc Rıdvan b. Abdullah, İdris Çelebi