Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 351 Hüküm no: 455 Orijinal metin no: [68a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Miras payının alındığı Oldur ki Kasaba-i Beşiktaş’da vâki‘ Sinan Paşa mahallesi sükkânından olup mahmiye-i Selânik’e gider iken sefînesinde katl olunan merhûm Hasan Reis b. Abdullah’ın hâlen nefs-i Selânik’te Kazasker mahallesi demekle ma‘rûf mahallede sâkin olup nakl-i şehâdet ile verâsetleri sâbite olan sulbiye kızı Bâkıye nâm sagīrenin bimâ hüve tarîkü’s-sübût vasîsi ve müteveffâ-yı mezbûrun menkûhası ve zevcesi Âişe Hâtun’un babası olup ve yine bi tarîki’s-sübût vekîl-i şer‘îsi olan Ali b. Mustafa mahfil-i kazâda işbu sâhibü’l-kitâb zikr olunan Sinan Paşa mahallesinde sâkin olan diğer sagīre kızı Fâtıma’nın tarafından vasî ve diğer zevcesi Canfeda Hâtun tarafından vekîl-i şer‘îsi olan kıdvetü’l-emâsil Bâli Çavuş b. Hüseyin muvâcehesinde ikrâr kılıp hâlen kassâm defteri mûcebince zuhûr eden muhallefâtının bahâsı cümlenin ma‘rifeti ile hâli üzre vaz‘ olunan hânede vâki‘ hisse-i şayi‘alarından gayrı ve yine müvekkilem mezbûre Âişe’nin mehr-i müecceli olup hâzır şâhid bulunmamağla cümlenin rızâsıyla mûmâ-ileyh Bâli Çavuş’a emânet vaz‘ olunan üç bin akçeden mâ‘adâ ba‘de edâi’d-düyûn on bin altı yüz elli beş akçeden sümün hisse ki altı yüz yetmiş beş akçe eder müvekkilem mezbûre Âişe için ve yine zikr olunan üç bin altı yüz elli beş akçeden ihrâc olunan sümünden mâ‘adâ bâkī kalan dokuz bin iki yüz seksen akçeden vasîsi olduğum mezbûre Bâkıye’nin hisse-i şer‘iyyesi -ki dört bin altı yüz kırk iki buçuk akçe eder- sagīre-i mezbûre Bâkıye tarafından vesâyetim ve müvekkilem mezbûre Âişe tarafından vekâletim hasebiyle bî-kusûr alıp kabz eyledim, zikr olunan hânede vâki‘ sümün ve sagīre-i mezbûrenin hisse-i şer‘iyyesinden mâ‘adâ ve emânet vaz‘ olunan sâlifü’z-zikr mehr-i müeccel üç bin akçeden mâ‘adâ bir akçe ve bir habbe hakları bâkī kalmadı deyicek mukırr-ı merkūm Ali’nin ikrârını mukarrun lehü’l-mesfûr Bâli Çavuş vesâyeten ve vekâleten tasdîk eyledikden sonra vâki‘ hâl ketb ve zabt olundu. Tahrîren fî evâhiri Zilhicce sene sitte ve elf. Şuhûd: Kâtibü’l-hurûf Derviş el-Müderris, İdris Çelebi, Musli Çelebi el-Bevvâbü’s-sultânî mahkeme muhzırı, Şaban b. Abdullah el-Cündî, Ali b. Abdullah el-Cündî ve gayruhüm