Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 358 Hüküm no: 464 Orijinal metin no: [70a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bekir b. Abdullah’ın muhallefâttan eşya almadığı Ahrâr-ı müslimînden Mahmud b. Abdullah nâm kimesne mahfil-i kazâda işbu bâ‘isü’l-hurûf Bekir b. Abdullah râcil muvâcehesinde takrîr-i da‘vâ edip bundan evvel hâric-i Galata’da Ebülfazl mahallesinde sâkin iken fevt olan zevcem Ümmi Hâtun bt. Abdullah’ın metrûkâtından üç aded altın hâtem ve bir tâne mor kemhaya kaplı sansar kürkü ferâce ve bir hereni ve iki el değirmeni ve bir kutu cengalem? ve beş aded serâser yastık ve inci dizilmiş halhal ve bir küçük kese içinde tahmînen beş altı yüz mikdârı akçe ve bir kebîr leğen ve bir mukaddem kuşağımızı bir vechile alâkası ve verâseti yok iken alıp kabz etmiş hâlen taleb eylediğimde te‘allül eder kıbel-i şer‘den suâl olunmasını taleb ederin deyicek gıbbe’s-suâl akībe’l-inkâr müdde‘î-i mezbûrdan da‘vâsına mutâbık beyyine taleb olundukda ityân-ı beyyineden âciz ve kāsır olmağın sâlifü’z-zikr Mahmud’un talebiyle alâ haddihî her birisine yemîn teklîf olundukda zikr olunan esbâbı almadığına ve bir tarîk ile hakkıyla veyâhud âharın aldığına dahi ilmi muhît olmadığına yemîn billâh eylemeğin vâki‘ hâl gıbbe’t-taleb ve’s-suâl ketb olundu tahrîren fî evâhiri Zilhicce sene sitte ve elf. Şuhûd: Yunus Bey b. Abdullah, Ahmed b. İsmail el-İmâm, Mehmed b. Süleyman, İskender b. Cârullah ve Kâtibü’l-hurûf Derviş el-Müderris ve gayruhüm